O PP rexeitou hoxe a proposta da deputada socialista, Patricia Vilán, para que se solicite ao Goberno do Estado a comarcalización dos servizos do IMELGA (Unidades de Valoración Forense), Oficinas de Atención ás Vítimas e a Policía Xudicial.

“Se hai servizos comarcalizados como a Tesourería do Estado, que non están en cidades grandes e funcionan razoablemente, por que non disto?”, preguntou Vilán que sinalou as complicacións que teñen as mulleres á hora de trasladarse á Coruña ou Vigo. “Hai mulleres con dificultades para moverse coas malas comunicacións do transporte público”, sentenciou Vilán.

Galicia rexistrou 6436 denuncias por violencia de xénero en 2017 (un 13,3% máis que en 2016). Segundo datos do Observatorio contra a Violencia Doméstica e de Xénero do CGPJ, un 73% dos asasinatos ocorren en poboacións inferiores a 100000 habitantes, o que alerta de que a “ruralidade” é un factor de vulnerabilidade.