Critica que o conselleiro conceda “importancia relativa” ás listas de agarda, cando son unha das causas da deficiente situación na que está a sanidade

A deputada socialista ve “alarmante” a falla de investimento, que sitúa a Galicia á cola en gasto per cápita para sanidade, xunto coa educación e as políticas sociais

O Grupo Parlamentario dos Socialistas de Galicia esíxelle á Xunta que poña en marcha un plan de choque para rebaixar o tempo de espera nas consultas do Hospital Clínico Universitario de Pontevedra e no Centro Hospitalario do Salnés. A través dunha iniciativa asinada pola deputada Paloma Castro, demanda tamén a posta en marcha de medidas efectivas para acurtar a agarda para cirurxías no complexo universitario de Pontevedra, así como a das probas diagnósticas na área sanitaria de Pontevedra-O Salnés.

A parlamentaria socialista criticou que, “ante uns datos alarmantes” o conselleiro de Sanidade lle concedera “importancia relativa” ás listas de espera. “É significativo”, di, dunha “nula vontade” de arranxar a situación por parte da Xunta de Galicia. “Estamos ante unha cronificación dun problema ao que non se quixo poñer remedio a tempo e agora se converteu nun gran problema”, asegura na súa iniciativa.

As demoras na atención para cirurxías, probas diagnósticas e consultas con especialistas son unha das principais deficiencias da sanidade pública galega, e correspóndense coa “alarmante” falla de investimento, “xa que Galicia se sitúa á cola en gasto per cápita para Sanidade, xunto con educación e políticas sociais”. Esas esperas causan nos pacientes tanto como nos seus familiars “malestar, angustia e inseguridade”.

Paloma Castro lamenta que ata o momento “non existiu nin existe planificación nin xestión para estar á altura do que necesitan os usuarios da sanidade pública”.

Por outra banda, respecto do caso concreto da área sanitaria pontevedresa, Castro lembra que a Xunta anunciou que as obras do Gran Montecelo rematarían no 2025. “Esperamos que non se demoren máis”, di respecto á necesidade de que o complexo se atope ao cen por cen da súa operatividade “canto antes” co fin de contribuír a un mellor funcionamento da atención.