Alerta de que logo de 14 anos de espera, o goberno galego estea abrindo a porta ao incumprimento do Plan de usos porque “vai quedar pequeno”

A parlamentaria socialista Paloma Castro esixiulle hoxe ao goberno galego que garanta o cumprimento do Plan de Usos do Gran Montecelo e que manteña o uso sociosanitario do Hospital Provincial. A responsable socialista presentou unha pregunta oral no Pleno do Parlamento logo de que a Xunta abrira a porta a incumprir a previsión do Gran Montecelo logo de 14 anos de espera.

Castro esixiulle ao conselleiro de Sanidade que explique as recentes declaracións do xerente da Área Sanitaria abrindo a posibilidade de que parte dos servizos non teñan encaixe na nova reforma, que vai quedar pequeno, e queden no Provincial, incumprindo o acordo cos profesionais do sector.

Aludiu ao retraso no traslado das áreas de hospitalización de Oncoloxía, Psiquiatría, parte de Medicina Interna e varias das unidades nas que se practican cirurxías ambulatorias. Trasladou a preocupación do Grupo Socialista diante do “incumprimento do planificado” e tamén a “discriminación” do servizo de Psiquiatría, que leva padecendo unha “evidente discriminación” dende hai anos e que se atopa nunha “situación insostible” pola falla de persoal e de medios.

A parlamentaria socialista criticou os “bandazos” dos dous últimos anos por parte do goberno galego con relación ao futuro do Hospital Provincial, un inmoble vencellado ao uso sanitario dende o século XV e que o PP “pretendían convertelo nunha residencia universitaria”, dando un paso máis no desmantelamento da asistencia sanitaria pública.

Explicou que esta situación deriva da xestión desastrosa do PP, que en 2011 “emperrouse” en paralizar o proxecto de hospital para Pontevedra iniciado polo goberno presidido polo socialista Pérez Touriño, e mudalo por unha “obra faraónica que, como o tempo demostrou, non tiña nin pés nin cabeza”.