A parlamentaria socialista Paloma Castro vén de presentar unha batería de iniciativas parlamentarias para reclamarlle á Xunta que colabore coa Deputación e o Concello de Pontevedra para levar adiante a rehabilitación do Convento de Santa Clara. Castro presentou esta iniciativa logo da cesión ao Concello, o pasado 1 de decembro, deste inmoble que data do século XIII.

Castro reivindicou o valor patrimonial, histórico e previsiblemente turístico do inmoble, recentemente aberto aos novos titulares e aínda pendente de análise polo seu nivel de conservación e estado arquitectónico. Reclámalle á Xunta que asine un protocolo de colaboración co Concello e a Deputación -que complemente o asinado o pasado martes entre ámbalas dúas institucións- para asumir a lo menos o 50 por cento do investimento d a recuperación do inmoble.

A responsable socialista salientou o valor cultural do edificio logo dunha primeira visita oficial na que constatou o valor do inmoble, que ademais do valor arquitectónico conta de portas adentro cun “verdadeiro oasis en medio da cidade, un bosque con árbores, vides e froiteiros”.

Sinalou o valor do edificio do século XIII, que en tempos foi convento de clausura das monxas clarisas, e que a comezos deste mes foi cedido ao Concello de Pontevedra. Logo de 750 anos, e despois dunha compra – venda de 3,2 millóns de euros, o edificio ten pasado a ser un ben público patrimonio de tódolos pontevedreses e pontevedresas..

Salientou o posible valor do inmoble para ser incorporado ao circuíto museístico dunha cidade que conta cunha “enorme riqueza patrimonial” que neste momento “non pode ser exposta ao público por falla de espazo”.