O viceportavoz do Grupo Socialista, Pablo Arangüena, presentou hoxe na Comisión de Industria do Parlamento unha proposición non de Lei para reclamarlle á Xunta un Plan de Reactivación Económica da área da Coruña para afrontar o impacto da crise da covid. O responsable socialista lamentou o veto do PP a esta proposta: “demostra que non hai previsión, non hai acción e non hai nada” por parte da Xunta.

Arangüena sinalou que “a maior crise económica das nosas vidas ten que ter unha resposta á altura”, polo que reclamou un plan de choque económico da área que incorpore a diagnose das posibilidades económicas da zona. Reclamou incorporar os proxectos radicados na área para optar aos fondos Next Generation, mentres a Xunta pasou de anunciar 7, a 108 e agora 354, “pero dos que ninguén sabe en que consisten nin quen está detrás, se é que existen realmente”.

Reprochoulle ao portavoz do PP que “só fose capaz de mencionar 3 proxectos na área da Coruña dos 354 que di que ten a Xunta de Galicia” e que “desvíe ás administracións locais unha reactivación que ten que liderar a Xunta de Galicia dentro das súas competencias exclusivas de política industrial e promoción económica, e non practicar coma sempre o escapismo”.

O parlamentario socialista presentou esta proposta “de sentido común e de xustiza” para afrontar unha “perspectiva certamente espeluznante” para a principal área económica de Galicia, e que de acordo coa Cámara de Comercio da Coruña sufrirá de cheo o impacto da crise, coa perda de 16.000 postos de traballo e 5.700 millóns de euros en facturación.

Advertiu de que “é imprescindible que a Xunta, que ten a competencia, as capacidades e a responsabilidade”, desenvolva unha acción contundente para compensar o impacto da pandemia coa participación das entidades representativas do empresariado, as administracións locais, sindicatos e a universidade”.

Fiascos

Sinalou que a área metropolitana “necesita dun moito maior compromiso económico da Xunta de Galicia, que non existiu na última década”, dez anos que se pecharon con “tres grandes fiascos non compensados por ningún éxito”. Citou así o “fiasco” de Hércules de Armamento, que “non moveu un tornillo en 5 anos”, e os do centro loxístico de Pemex e o investimento de 270 millóns de euros do grupo chino Beijing 3E en Punta Langosteira, que quedaron “en nada”.

Lamentou a falla de resultados do goberno galego, que non foi quen de facer nada diante da absorción do Banco Pastor e do Banco Galego, e que foi o muñidor da desaparición da antiga Caixa Galicia. A mesma que observou impasible a perda de galeguidade de Fenosa e o peche dos seus centros de traballo. Tamén pecharon empresas como Fadesa ou Caramelo, deslocalizouse R, liquidouse Isidro de la Cal ou Isowat e Aluibérica ten enormes dificultades.

Sinalou que a economía da área coruñesa “móvese pola acción de empresas que non perciben ningunha vantaxe da acción económica da Xunta”, como o caso de empresas como Inditex, que “se moven pola súa conta e que non ven a utilidade de que a Xunta teña toda unha vicepresidencia Económica e Consellería de Industria, Empresa e Innovación que non lles serve absolutamente para nada”.