Carmen R. Dacosta sinala que a Xunta leva 3 anos sen remitir o proxecto, fundamental para evitar os asolagamentos das explotacións de pataca

Critica que o PP se negara a incluír no acordo aprobado hoxe a valoración dos danos nos cultivos de pataca e liñas de axuda directas

A Comisión de Agricultura do Parlamento aprobou hoxe unha proposición non de Lei presentada polo Grupo Socialista para reclamarlle á Xunta que lle remita ao Ministerio de Agricultura o proxecto de limpeza das canles da lagoa de Antela, na Limia, pola que levan 3 anos agardando para empezar as obras.

A portavoz de Política Forestal do Grupo Socialista, Carmen Rodríguez Dacosta, explicou que esta actuación resulta fundamental para evitar os asolagamentos das explotacións de pataca que coas chuvias deste inverno provocarán perdas de 57 millóns de euros. Explicou que o Ministerio ten comprometido 15,9 millóns de euros para modernizar os regadíos da Limia, así como 12 millóns de euros para a limpeza de canles que non pode entregar mentres non reciba comunicación da Xunta.

Dacosta lamentou sen embargo que o PP deixara fora do acordo a parte da proposta socialista que lle reclamaba ao goberno galego que cuantificara os danos sufridos na produción de pataca e cereal durante o ano 2024, así como a establecer unha liña directa de axudas para paliar os danos sufridos este ano.

Reclamoulle ao goberno galego que atenda ás necesidades urxentes dos agricultores da Limia, que por segunda vez este ano están a sufrir as consecuencias das condicións meteorolóxicas adversas. Logo das chuvias do temporal Kirk, sinala, “onde debería haber tractores e máquinas recollendo a colleita de pataca só hai leiras asolagadas”, e dos 120 millóns de quilos de produción que se ían recoller este ano, apenas superan os 15, tal e como advirten os produtores.

Lamentou a desatención do goberno galego ás necesidades destes produtores, que xa viñan reclamando apoio do goberno galego logo das chuvias de marzo e abril, para axudar na nefasta campaña de cereal. Sen embargo, criticou que o goberno galego “negouse en redondo a realizar unha valoración técnica dos prexuízos económicos causados, así como para tomar medidas de compensación da ínfima colleita”.

Texto da iniciativa aprobada hoxe:

-“O Parlamento de Galicia insta á Xunta de Galicia a que con urxencia remita ao Ministerio de Agricultura o proxecto para a execución das obras de limpeza da canle principal e secundarios na lagoa de Antela, tal e como se comprometeran no ano 2021”.