Carmen R. Dacosta esíxelle ao goberno galego que remate co proceso e faga entrega de inmediato dos títulos de propiedade das 3.422 fincas resultantes

A portavoz de Política Forestal do Grupo Socialista, Carmen Rodríguez Dacosta, esixiulle hoxe á Xunta que “deixen as escusas” e desbloqueen a concentración parcelaria que iniciaron hai 30 anos no concello ourensán de Cartelle. Dacosta presentou unha pregunta oral na Comisión de Agricultura do Parlamento na que alertou de que aínda resta a entrega dos títulos de propiedade para preto de 1.200 veciños e veciñas.

Os propietarios están a sufrir importantes problemas xa que, pola incompetencia do goberno galego, aínda non teñen a escritura que certifica a titularidade das 3.422 fincas resultantes do proceso, o que os obriga a se desprazar ata as oficinas agrarias na procura dunha certificación cada vez que precisan solucionar algún problema relativo coas súas parcelas.

A responsable socialista criticou as constantes “escusas de mal pagador” por parte do goberno galego, que “primeiro apuntou á Lei Hipotecaria de 2015, despois á revisión cartográfica, logo ás notificacións das informacións contraditorias, e agora a culpa é a Notaría”. Dacosta dixo que “non caben xa máis escusas, o que teñen é que pedirlle perdón con humildade aos veciños e veciñas afectados e resolver esta situación”

Lembrou que o goberno galego está a incumprir ademais o mandato desta mesma Comisión de Agricultura, que en abril de 2022 aprobara por unanimidade unha proposición non de Lei do Grupo Socialista para esixirlle ao goberno galego que solucionara este problema de forma urxente. Dixo que “o seu desleixo evidencia o abandono que padece a veciñanza dos concellos do interior por parte dun goberno que está a deixar morrer o rural”.