Carmen R. Dacosta alerta de que ao dividir cada brigada en dúas deixan unha dela sen xefe e polo tanto inoperativa

A portavoz de Política Forestal do Grupo Socialista, Carmen Rodríguez Dacosta, alertou hoxe de que a decisión da Xunta de desdobrar cada brigada contra incendios en dúas deixa de facto inoperativos á metade dos dispositivos. Explicou que ao dividilas en dúas pero non contratar novo persoal, só unha delas leva ao xefe de brigada, o que impide activar á outra: “é coma se tiveramos 50 helicópteros e só 25 pilotos”, resumiu.

Dacosta deu a alarma desta situación na Comisión de Agricultura do Parlamento, onde presentou unha proposta para que a Xunta garanta as prazas de xefes de brigada necesarios no Servizo de Prevención e Defensa contra os Incendios Forestais, que o PP rexeitou malia coñecer deste “desastre”.

A responsable socialista explicou que as brigadas, que antes estaban integradas por 7 membros -un xefe de brigada e 6 bombeiros-, por decisión da Consellería do Medio Rural agora quedan divididas en dúas secuencias, unha con catro traballadores -a que leva ao xefe con ela- e outra con tres, esta última sen xefe de brigada e polo tanto inoperativa.

Advertiulles que “desdobrar as quendas non significa ter o dobre de efectivos, que semella que é o que vostedes queren facer crer”, senón que “constitúe un desastre”. Puxo de manifesto neste sentido que cando a Xunta desprega o operativo e manifesta que 5 brigadas acoden a un incendio, en realidade son 10 traballadores forestais, só tres máis dos 7 que integraban as brigadas anteriormente.

Carmen R. Dacosta comezou a súa intervención trasladando as condolencias a Portugal polo drama dos lumes da semana pasada, que lle custaron a vida a 7 persoas e arrasaron con 100.000 hectáreas e que. Reclamoulle ao goberno galego que tome nota do que sucedeu no país veciño, e alertou de que Galicia no está nin de lonxe preparada para afrontar unha situación semellante, co cambio climático, o abandono do rural e, agora, o desmantelamento das brigadas.