O parlamentario socialista Martín Seco lamentou hoxe que os orzamentos da Xunta de Galicia do 2021 para as comarcas da Costa da Morte e Bergantiños como “unha nova oportunidade perdida para o goberno de Feijóo para tratar de impulsar as potencialidades dunhas comarcas abandonadas polo PP sistematicamente”.

O responsable socialista sinalou que “o abandono que senten os concellos cando teñen que asumir as competencias que deberan de ser propias da administracións autonómicas, en servizos sociais, educación e sanidade e que minoran a capacidade dos concellos para poder axudar a veciñanza, vense multiplicadas pola falla de inversión dos orzamentos”.

Estas contas, engadiu, “non actúan para fixar poboación no noso rural, non avanzan nas infraestruturas necesarias para darlle competitividade ás nosas empresas e portos, non actúan no desenrolo turístico e nin tan sequera dan solución os múltiples problemas coa xestión do saneamento das augas que verten os nosos concellos”.

Martín Seco sinalou que “a baixa capacidade inversora en actuacións na rede de infraestruturas viarias lastra o futuro económico da comarca e a fixación de poboación no territorio”. Apuntou que “a demora constante dunha forte inversión na Vía de Alta Capacidade da Costa da Morte coas dúas variantes, que a este ritmo será unha realidade o século que vén, e a falla de actuación contra a inxusta peaxe da AG-55, lastra as posibilidades dunha comarca que debera de poder exercer as súas potencialidades”

Dixo que, ademais, “a Xunta de Galicia esquece ao Hospital Virxe da Xunqueira, sen o servizo de cardioloxía e abandonado ata no seu aspecto exterior pola consellería, esquece actuar nos servizos sociais no desenrolo da axuda ao fogar, na implantación da dependencia, na RISGA, na implantación de centros de día e nos centros educativos abandonados dende Ponteceso ata Carnota”.

Seco subliñou que “necesitabamos que a Xunta se implicase no desenrolo dos portos e a súa actividade económica, na comunicación dos seus polígonos industriais e na súa conectividade á banda ancha, pero vemos como a Xunta introduce pequenas partidas que non corrixen os déficits dun territorio esquecido nestes 12 anos de goberno de Alberto Núñez Feijóo”.