A parlamentaria socialista Noa Díaz vén de denunciar a “conivencia” da Xunta coa empresa concesionaria da mina de Casalonga para “converter a explotación nun vertedoiro”. A responsable socialista visitou hoxe a mina, onde presentou unha serie de iniciativas parlamentarias para reclamarlle á Xunta que garanta a protección e recuperación ambiental da canteira.

A responsable socialista mantivo hoxe un encontro cos representantes da Plataforma Casalonga Limpa de Resiudos, no que participaron os alcaldes dos concellos limítrofes de Ames -Blas García- e Brión –Pablo Lago-, así como a portavoz do PSdeG no Concello de Teo, Uxía Lemus. Díaz presentou unha batería de iniciativas para que a Xunta dea conta do seu desleixo fronte ao vertido incontrolado de residuos nas parcelas da canteira con déficit absoluto de seguridade na zona.

Noa Díaz acusou ao goberno galego de “poñérllelo todo fácil á empresa”, que logo de 2,5 anos sen actividade extractiva, e cando “tiñan que producir a caducidade da actividade mineira”, o que fixeron foi decretar a súa suspensión cautelar porque “parece molestarlles que de vez en cando haxa veciños da Plataforma na zona”.

Pediulle ao goberno galego que faga unha nova Declaración de Impacto Ambiental –DIA- da explotación, logo de que a Xunta dixera no seu día que tiña que presentar un informe detallado da fauna e flora, pero que “quedou en nada”. Denuncia así que a Consellería de Medio Ambiente permita que o Plan de Restauración presentado pola empresa saia adiante baseado nunha DIA de 2001.

Lembrou que os informes reflicten a situación da zona hai 20 anos, e considera “cando menos curioso que a Xunta non teña en conta o cambio absoluto da contorna”, obviando que neste período a lo menos foron creadas dúas lagoas naturalizadas con ecosistemas completos asentados que non existían cando foi redactado o plan de restauración de 1998.