A deputada Patricia Iglesias defendeu apostar polos produtos de proximidade porque “non é só unha cuestión económica, senón tamén de responsabilidade social e ambiental. Galicia ten os recursos e os produtores, pero falta vontade política para que a súa inclusión na contratación pública sexa unha realidade”

Iglesias logrou o apoio de BNG e PP para demandar á Xunta medidas concretas para garantir que os produtos de km0 sexan prioritarios nos comedores escolares, hospitais e residencias xa que constitúe unha ferramenta clave que podería empregarse para fortalecer a economía local

O Grupo Socialista logrou hoxe o apoio de PP e BNG a súa iniciativa que insta á Xunta de Galicia a adoptar medidas concretas para garantir que os produtos de proximidade sexan prioritarios na contratación pública en colexios, hospitais e residencias xa que a contratación pública representa preto do 20% do PIB galego e constitúe unha ferramenta clave que podería empregarse para fortalecer a economía local, mellorar a calidade alimentaria e reducir o impacto ambiental. A falta dunha estratexia clara por parte do goberno galego, denunciou a deputada Patricia Iglesias, “está a permitir que grandes multinacionais, como EULEN, se beneficien destes contratos en detrimento dos produtores galegos”.

Iglesias, que defendeu esta iniciativa na Comisión, subliñou que “apostar polos produtos de proximidade non é só unha cuestión económica, senón tamén de responsabilidade social e ambiental. Galicia ten os recursos e os produtores, pero falta vontade política para que a súa inclusión na contratación pública sexa unha realidade”.

Para a socialista a realidade é clara: mentres outras comunidades avanzan con estratexias concretas, como Cataluña coa súa Estratexia Catalá de Mellora da Compra Pública, a Xunta continúa sen un plan efectivo que impulse o consumo de produtos galegos. O PSdeG propoñía que a contratación pública contemplase criterios que primen a compra de produtos de proximidade, o que permitiría impulsar ás pequenas e medianas empresas locais, garantir unha alimentación máis saudable e reducir a pegada ecolóxica. Incorporar estes criterios tamén facilitaría a transición cara a unha economía máis sustentable, reducindo a dependencia de cadeas de subministración longas e vulnerables a crises internacionais.

Ademais, como sinalou a socialista, a Estratexia Nacional de Contratación Pública 2023-2026 xa contempla a necesidade de adaptar as compras públicas ás singularidades autonómicas, pero a Xunta segue sen desenvolver unha folla de ruta clara para fomentar os produtos locais. Nesta liña, Iglesias lembrou na súa intervención o impacto ambiental do consumo de produtos foráneos, xa que o transporte a longa distancia incrementa as emisións de CO₂. “O consumo de produtos galegos permitiría reducir esta pegada ecolóxica, aliñándose cos obxectivos do Pacto Verde Europeo”, dixo.

O Grupo Socialista, co apoio do PP e BNG,  insta á Xunta a actuar con urxencia e a deixar de lado os anuncios baleiros “porque Galicia ten capacidade e recursos para desenvolver unha política pública que beneficie tanto á economía como á cidadanía. Non se trata de propaganda, senón de compromisos reais que impacten positivamente na nosa terra, concluíu Patricia Iglesias.

Texto da iniciativa aprobada hoxe:

O Parlamento galego insta ao Goberno galego a que:

1. Que aprobe no 2025 unha estratexia de contratación pública, para que entre outros obxectivos, se recolla especificamente o de fomentar a economía de proximidade e o consumo de produto local galego nas contratacións públicas das diferentes entidades do sector público autonómico (hospitais, escolas infantís, colexios, residencias de maiores), para así contribuír á transición enerxética e redución do uso de combustibles fósiles.

2. Nas contratacións públicas de servizos de comedor, cátering ou cafeterías que se liciten polas entidades do sector público autonómico galego, deberá recollerse como criterio de adxudicación ou como condición especial de execución cláusulas que favorezan o sinalado no punto anterior, como as relacionadas coa pegada de carbono ou calidade de prestación na medida en que a compra de produtos de proximidade reduce a pegada de carbono e ao impacto ambiental de determinadas compras.