O portavoz do Grupo Socialista insta ao presidente da Xunta a aclarar se se vai aliar e facer pactos con Vox, “un partido negacionista da violencia machista e que quere acabar coas políticas feministas”

O portavoz do Grupo Socialista, Luis Álvarez, esixiulle hoxe ao goberno galego solucións e medidas eficaces en materia de igualdade para rematar coa fenda entre mulleres e homes e para acadar unha equiparación real en todos os niveis da sociedade.

Fíxoo no Pleno do Parlamento, na sesión de control ao presidente da Xunta, onde tamén puxo en evidencia que despois de 13 anos “erráticos do goberno do PP e dunha nefasta política de igualdade, Galicia está moito peor que o resto de España nesta materia”. “Os datos”, lamentou Álvarez, “corroboran o fracaso e a inexistencia de medidas efectivas de igualdade na súa etapa á fronte da Xunta de Galicia”.

Nesta liña cualificou de “propaganda” a nova Lei de igualdade anunciada polo goberno galego e da que  “só temos constancia a través de anuncios nos xornais”. Ademais, Luis Álvarez amosou a súa preocupación por que “non sexa máis que papel mollado” e, en consecuencia, “ineficaz para corrixir a inacción da Xunta en 13 anos de goberno”. Subliñou tamén que esa lei “non debe ser extraordinariamente urxente para o goberno galego”, toda vez que o presidente explicou que viría ao Parlamento a finais de ano.

Neste contexto, Álvarez tivo que recordarlle a Feijoo que “a política de igualdade hai que crela” porque “o 8M vai máis alá de facer un cartel e subilo a redes sociais”. Por iso, incidiu na necesidade de impulsar mecanismos e políticas transversais en todos os ámbitos con “medidas reais que permitan acadar unha igualdade efectiva entre mulleres e homes”. “Galicia precisa feminizar as súas institucións e precisa dun goberno feminista”, proclamou o portavoz parlamentario do PSdeG antes de preguntarlle ao presidente se é feminista e sobre as medidas que pensa adoptar para rematar coa fenda de xénero en todos os eidos da sociedade.

Así, ante a carencia de políticas efectivas por parte da Xunta, o voceiro do Grupo Socialista instouno a que se poña a traballar en actualizar do plan de atención á saúde da muller, en crear un instituto da saúde integral da muller ou en desenvolver o Estatuto da Muller agricultora e gandeira.

Tamén marcou como prioridades elaborar unha nova estratexia de igualdade no medio rural, establecer cláusulas de igualdade con perspectiva de xénero nas licitacións públicas e pór en práctica medidas concretas da lexislación en materia de igualdade no traballo. En definitiva, “desenvolver políticas reais e específicas para combater a desigualdade en Galicia”.

Ao mesmo tempo, Luis Álvarez tamén puxo de relevo a as contradicións e incoherencias nas que pode entrar Feijoo no seu novo rol como presidente do PP nacional. En concreto, na súa política de pactos “cun compañeiro de viaxe como Vox”. “A dúbida que nos xorde hoxe”, apuntou, “é se o que vostede está defendendo aquí o vai seguir defendendo cando teña que aliarse e facer pactos con quen quere acabar coas políticas feministas”.

Tras lembrar as numerosas declaracións da formación de ultradereita contra a igualdade, Luis Álvarez subliñou que, “o máis grave é que Vox é un partido negacionista coa violencia machista, señor Feijoo”. “E con isto”, zanxou, “no PSdeG queremos contudencia”. Deste modo, insistiu en convidar ao presidente da Xunta a que “diga alto e claro nesta Cámara galega se é ou non feminista, para que o escoiten aqueles que o van levar da man aos despachos de Génova 13”.

13 ANOS DE FRACASO EN MATERIA DE IGUALDADE

Na súa intervención, Luís Álvarez lembrou que a foto fixa constata que Galicia está peor que o resto do Estado en materia de igualdade. Nesta liña debullou as cifras que demostran as diferentes fendas que separaran a homes e mulleres en todos os eidos.

Así, a poboación activa feminina é inferior á masculina en case 50.000 persoas, o que supón unha diferenza do 8,8% na taxa de actividade. Galicia tamén se atopa, na taxa de actividade feminina, 5,4 puntos pro debaixo da media estatal e, segundo a media anual da EPA de 2021, conta cunha diferencia do 2,2% entre o número de homes ocupados e de mulleres ocupadas no conxunto do mercado do traballo.

Ademais -a maiores de teren máis paro e máis contratos parciais- as mulleres “sofren de forma máis notoria a contratación temporal”. Debido a isto, a igual nivel formativo, os homes sempre manteñen taxas de ocupación superiores, agás na educación superior, onde se igualan. Por outra banda, o 76,4% das reducións de xornada por coidado legal son solicitadas por mulleres; ao igual que as excedencias por coidado familiar, nas que o 74% son acaparadas por mulleres.

Luis Álvarez explicou que, malia que a suba do SMI fixo que a fenda salarial mellorara en 2019, “hoxe aínda persiste unha fenda retributiva entre mulleres e homes en Galicia que se cuantifica nun 19,3%, o que implica que a muller traballe case dous meses ao ano sen cobrar”.

Por outra banda, alertou de que “a pandemia fixo que todo fose a peor”. Nesta liña, a falla de medidas por parte da Xunta para paliar o efecto da crise da covid na cuestión de xénero fixo que a fenda de ocupación entre homes e mulleres se incrementase nun 65%, segundo datos de UXT. Deste xeito, Álvarez reprochoulle ao presidente da Xunta que de 170 grupos de ocupacións, só en 28 hai unha representación paritaria entre homes e mulleres.

A fenda de xénero tamén se constata noutros ámbitos como é o caso do persoal docente e investigador. Aquí, á dunha fenda salarial de xénero débese ao escaso número de mulleres que ascende na escala xerárquica. Ademais, esas mulleres vense penalizadas cando deciden ser nais porque non se lles recoñece de xeito contundente o tempo da baixa de maternidade como tempo efectivo de traballo.

Luís Álvarez remarcou que a fenda de xénero tamén afecta ao ámbito familiar, “onde as mulleres seguen sendo as principais encargadas das tarefas do fogar e da labor de coidados de maiores e menores”. Así, lembrou que en España, segundo datos do INE, as mulleres dedican unha medida de 26,5 horas semanais a estas tarefas, fronte ás 14 horas que dedican os homes.

Tamén lamentou a fenda de xénero nas carreiras STEM ou a desigualdade nos patios das escolas, “onde se precisan políticas encamiñadas a rachar coa desigualdade de xénero dende o berce dentro do ámbito educativo”.