Salienta a importancia desta modalidade produtiva para o mantemento da paisaxe e da poboación rural, e que sustenta a súa candidatura a Patrimonio da Humanidade da Unesco

A portavoz de Agricultura do Grupo Socialista, Lara Méndez, reclamoulle hoxe á Xunta unha liña de axudas específica para a agricultura heroica da Ribeira Sacra. Méndez presentou unha pregunta oral na Comisión de Agricultura do Parlamento para garantir a continuidade dunha viticultura tradicional singular fundamental para o mantemento da paisaxe e da poboación rural, que sustenta a candidatura a Patrimonio da Humanidade da Unesco.

A responsable socialista advertiu que “hai parcelas que superan o 80 por cento de pendente”, polo que “non estamos a falar dunha Denominación de Orixe máis nin de seguir promocionando ao sector, que tamén apoiamos, senón de liñas e axudas específicas” e garantir que a poboación poida vivir deste tipo de produción.

Lembrou que en outras autonomías, como Canarias, existen ese tipo de subvencións, “que van dos 2.310 aos 2.530 euros por hectárea”, e que en rexións como Aosta -Italia- ou Azores -Portugal- se teñen en conta as condicións peculiares das viticulturas extremas. “Iso tamén se pode facer dende a Xunta”, asegurou.

Tamén lle reclamou ao goberno galego que incorpore á denominación áreas agora abandonadas, cunha estratexia de impulso a novas canles de comercialización da denominación e orixe, con medidas de formación e captación de persoal cualificado dun sector que constitúe o motor económico máis importante da zona. Este sector contribúe a asentar poboación e dinamizar o rural, xerando valor engadido dende o punto de vista turístico e cultural.

Puxo en valor o traballo que se fixo dende a Deputación de Lugo, “que iniciou Besteiro e continuou o presidente Tomé, para conseguir ese distintivo de patrimonio mundial e así promocionar un territorio singular, unha forma de traballo singular e unha viticultura singular”.