Advirte de que instalaron menos da metade das 40.000 trampas previstas logo de que en 2023 máis que se duplicaran os avisos por velutinas, con 56.500

A portavoz de Agricultura do Grupo Socialista, Lara Méndez, advertiu hoxe que a Xunta está a incumprir o seu propio protocolo de instalación de trampas para velutinas. Méndez mantivo hoxe unha xuntanza con apicultores de Lugo para analizar a grave situación xerada por esta praga e a resposta da Xunta de instalación de trampas que “son poucas, chegan tarde e quedan sen revisar”.

A responsable socialista alertou de que “de nada vale” o sistema de trampeo deseñado pola Xunta cando nin eles mesmos seguen o seu propio protocolo e ademais de colocar menos da metade das trampas previstas, estas quedan sen revisar, polo que é inútil para detectar o estado da praga. Advertiu que mentres o PP fala dun global de 17.000 trampas instaladas, estas son menos da metade das 40.000 que anunciaba o propio director xeral de Gandería.

Méndez advertiu que a instalación foi especialmente escasa en concellos como O Incio, onde montaron 21 das 67 previstas, así como en Lugo -67 das 393-, Alfoz -5 de 55- ou Santiago, onde só puxeron 86 das 641 trampas previstas. Ademais, a instalación do trampeo chegou tarde, no mes de abril e cos niños de velutina xa construídos, e un mes e medio despois aínda non fixeron a revisión, polo que os datos recollidos “non servirán para nada”.

A responsable socialista reclamoulle ao goberno galego que atenda ás demandas do sector da apicultura e constitúa un Comité Asesor con presenza de tódalas administracións, entidades e sectores afectados, para fixar e coordinar a estratexia e as prioridades de gasto na loita contra esta praga. Reclamou “ferramentas” para acadar unha implicación real cos concellos galegos e os sectores económicos implicados para coordinar accións concretas de prevención e erradicación.

Tamén pediu impulso á investigación sobre a velutina para crear convenios coas universidades e aportar medios e financiamento suficiente para impulsar a técnica da manipulación xenética, que pasa por ser unha das poucas medidas eficaces para o control desta praga.