O portavoz de Marisqueo do Grupo Socialista, Julio Torrado, reclamoulle hoxe á Xunta que estreme as medidas de seguridade no Centro de Investigacións Mariñas –CIMA- de Vilanova, dependente da Consellería do Mar. Torrado levou a Comisión parlamentaria unha pregunta oral polo recente roubo de 5.300 exemplares de berberecho empregado na investigación para desenvolver resistencia ao parasito marteilia.

O responsable socialista amosou o seu “grao de sorpresa sobre o grao de control do produto”, que ten sido roubado ao remate do ciclo da investigación, “cando o produto é mellor para a súa recollida”. Advertiu que esta é a segunda ocasión na que o CIMA rexistra un roubo de berberecho empregado para investigación e tamén cando esta está a piques de rematar, producindo a perda de parte da investigación, que teñen que comezar de cero.

Torrado levou ao Parlamento a preocupación do sector, que “pregunta como pode ser que se perdan estes berberechos dúas veces”, polo que preguntou “ata onde chegan as medidas de seguridade, protección e control”. Sinalou ademais a relevancia desta liña específica de investigación fronte a un parasito que leva dez anos atacando os bancos de berberecho de practicamente tódalas rías galegas, sinaladamente nos Lombos do Ulla, en Arousa.