O secretario xeral do PSdeG insta á Xunta a traballar en tres eixos: o relevo xeracional, a dixitalización das subastas de gando e a certificación telemática do pastoreo

O secretario xeral de UU.AA., Roberto García, lamenta que “o medio rural só sexa prioritario en titulares” porque “queda marxinado” pola Xunta cando “chega a hora da execución orzamentaria”

O secretario xeral do PSdeG, Gonzalo Caballero, mantivo hoxe unha xuntanza de traballo co secretario xeral de Unións Agrarias, Roberto García, para abordar os retos do mundo rural e agrario en Galicia.

“Necesitamos un compromiso claro con todas aquelas medidas que permitan que o medio rural e o agro poidan resistir e afrontar os retos de futuro”, reivindicou o máximo dirixente dos socialistas galegos antes de propoñer “tres medidas importantes e concretas” que “hai que incorporar nun gran pacto polo rural”.

Así, Gonzalo Caballero pediu á Xunta de Galicia que aposte polo relevo xeracional nas explotacións agrícolas e gandeiras, pola dixitalización das subastas de gando e pola incorporación de ferramentas dixitais para o control do pastoreo.

Sobre a primeira destas propostas, o máximo responsable do PSdeG subliñou que “cando hai mozos e mozas dispostos a coller o relevo xeracional e dar un impulso ao medio rural, é un deber da Xunta de Galicia apoialos, poñerse ao seu carón”.

“Hai que dar posibilidades de futuro á xente moza e apoiar á Galicia rural”, defendeu, polo que requiriu que a Xunta destine parte dos fondos de reactivación para abordar o futuro do rural.

Trátase, como dixo Gonzalo Caballero, de dotar ás explotacións gandeiras nas que se produzan incorporacións de mozos dun “complemento económico” que permita que “poidan sobrevivir ante as dificultades” deste momento e acometer “modernizacións” nas súas instalacións.

DIXITALIZACIÓN

Ademais, o líder socialista instou á Xunta a “que aposte pola dixitalización das subastas de gando”, o que permitiría “modernizar a actividade” e reducir certas dificultades da intermediación. Ademais, engadiu, isto hai que enmarcalo nun conxunto de melloras para o sector e a seguridade alimentaria.

Por último, propuxo “afrontar a dixitalización do pastoreo”, co obxectivo de ofrecer un leite con valor engadido que estaría garantido por mecanismos de monitorización do gando, con colares dixitais que rexistren as horas de pastoreo.

ROBERTO GARCÍA

Por outra banda, o secretario xeral de UU.AA., Roberto García, agradeceu a xuntanza de traballo co máximo dirixente das e dos socialistas galegos e destacou: “que o PSdeG acepte estas propostas orzamentarias nun eido tecnolóxico e de xente nova é apostar polo futuro, e o agradecemos de todo corazón”.

“Non pode ser que o medio rural só sexa prioritario en titulares, pero cando chega a hora da verdade, da execución orzamentaria da Xunta, quede marxinado”, censurou o responsable do sindicato agrario. Así, incidiu en que “non nos podemos permitir” que “unha soa persoa nova que decida incorporarse a unha explotación” deixe de facelo “por falla de cartos” ou “teña que agardar polo proxecto un ou dous anos”.

Ademais, defendeu a aposta polos “produtos diferenciados”, como o leite de pastoreo ou a tenreira galega. Sobre o leite, o representante de UU.AA. subliñou a importancia de que “non haxa problemas de etiquetado” que poderían arranxarse cunha certificación electrónica das “horas reais de pastoreo” e, no que atinxe á carne, indicou que “temos un problema básico: a remuneración a ese gandeiro estase realizando un euro por debaixo do que lle custa producir”.

Por iso, incidiu en que unha mellora nos prezos “vén por modernizar as estruturas de compraventa”, xa que “non podemos seguir en mans de tratantes que se quedan co beneficio do becerro”. Así, pediu “apostar” por que a subasta se realice de xeito dixital, xa que “non custa moito” e “impediría que os beneficios queden en mans de persoas que non lle aportan valor á comercialización”.

Por último, incidiu en que estes tres eixos, “non sendo cuantiosos” para o goberno galego, “significarían un paso decisivo” para o agro.