O secretario xeral sinala a Ciudadanos como “o novo respaldo da ultradereita” para chegar ao poder, tras amosarse “só disposto a pactar con PP e Vox”

Santiago, 18 de febreiro de 2019. O secretario xeral do PSdeG, Gonzalo Caballero, compareceu hoxe ante os medios -entre a xuntanza da Comisión Executiva Nacional Galega e a primeira reunión do Comité Electoral- para explicar o traballo que se porá en marcha de cara a “acadar unha maioría sólida e suficiente” que permita que Pedro Sánchez siga liderando “un goberno de progreso para a maioría” tralo 28 de abril.

“Estas eleccións xóganse en dous grandes bloques”, formulou o líder dos socialistas galegos, en alusión á esquerda, por un lado, e “á dereita e o centro dereita, que teñen dado un xiro cara á ultradereita abandonando o centro político do país”. Nesa banda, “hai tres papeletas que representan o regreso ás políticas do pasado, á falta de avances sociais e á falta de progreso para a maioría”.

Ao fío diso, tras apuntar que o Partido Socialista “ten todas as condicións para ser primeira forza en España”, Gonzalo Caballero criticou que un partido como Ciudadanos, que se referenciaba “no centro”, se teña convertido “no novo respaldo da ultradereita” para chegar ao poder. Así o dixo despois de que Albert Rivera se amosase “só disposto a pactar con PP e Vox, desprazando aos electores moderadores e de centro do seu obxectivo electoral”.

En canto aos socialistas galegos, o secretario xeral asegurou que “estamos plenamente motivados” e “imos ás eleccións con forza, con ilusión e con optimismo” e que “traballaremos para deseñar a mellor campaña posible”. Nesa liña, non só se constitúe hoxe o Comité Electoral, senón que mañá o secretario de Organización participará en Madrid na xuntanza presidida por José Luis Ábalos “para poñer a organización a traballar de xeito coordinado” nos dous procesos electorais que quedan por diante.

“Estamos plenamente motivados, porque cremos que o mellor que lle pode ocorrer ao país é un goberno socialista”, recalcou Gonzalo Caballero, consciente da “sangría electoral” que sufre o PP. “Por iso a Feijóo non lle gustan de repente as eleccións que tanto reclamaba. Porque sabe que as contas que tiña no pasado xa non lle dan no presente”, concluíu.