O líder dos socialistas censura a “irresponsabilidade” de que o PP non acelere o proceso de sucesión na Xunta “no peor escenario económico e social dos últimos 30 anos”

O secretario xeral do PSdeG, Valentín González Formoso, anunciou hoxe que os socialistas impulsarán no Parlamento autonómico unha lei para regular o xogo e as casas de apostas en Galicia. Fíxoo no marco dunhas xornadas de debate sobre o tema, organizadas polo PSdeG na Cámara galega.

Formoso explicou que neste foro estase dando a coñecer aos colectivos en Galicia que traballan por apoiar aos enfermos e enfermas adictas ao xogo unha proposta de proxecto de lei proposta que se vai presentar no Parlamento. Esta iniciativa pretende “cubrir o baleiro que deixa o goberno galego, que leva sen tomar medidas nunha área tan sensible para a nosa cidadanía e, sobre todo, para a xente nova do noso país”.

O secretario xeral dos socialistas galegos sinalou que se trata dunha “proposta ambiciosa” que se marca como gran obxectivo “protexer a xente máis nova do noso país con medidas tan innovadoras como o establecemento dunha distancia mínima das casas de apostas aos colexios”. Lamentou que “hoxe podemos ver algunhas a cinco metros da porta dalgún centro educativo, baleirando os patios dos colexios sen que o goberno  galego estea a facer absolutamente nada para evitalo nin se lle espere”.

Ademais, incidiu en que esa proposta incluirá prohibicións para que non haxa caixeiros automáticos  nas casas de apostas ou para que non existan reclamos como  zonas de xogo infantil para os nenos e nenas máis pequenos nas propias casas de apostas. Formoso chamou a atención sobre o feito de que “isto está ocorrendo no noso país coa conivencia do  goberno galego e sen que as autoridades competentes na materia fagan nada por regular esta situación”.

Desta maneira, “ante esa ausencia da Xunta, non so nesta materia senón nos últimos tempos en todas as materias estratéxicas de país o Partido Socialista está disposto a liderar o goberno en Galicia e poñer enriba da mesa medidas que noutros territorios xa se están a tomar”. Mentres, na nosa comunidade, “e pola desaparición  do goberno galego e a conivencia con este sector”, estanse deixando de aplicar.

Nas xornadas de debate sobre a lei do xogo organizadas polo PSdeG participaron o voceiro de Sanidade do Grupo Socialista, Julio Torrado; a secretaria da área de políticas Sociais da CENG, Margarita Martín Rodríguez; o director do proxecto de loita contra a ludopatía do Concello de Santiago, Ramón Molina; e o presidente da Asociación Galega de Ludópatas Rehabilitados (AGALURE), Francisco Gil.

“O PP DEBE ACELERAR O PROCESO DE SUCESIÓN NA XUNTA”

A preguntas dos medios de comunicación, Valentín González Formoso tamén urxiu ao Partido Popular de Galicia a acelerar o proceso de sucesión na Xunta. “Creo que no peor escenario económico e social de Galicia dos últimos 30 anos, é unha irresponsabilidade que non se teña xa resolto”, afirmou.

Nesta liña, incidiu en que “por desgraza, os tempos  habituais para este tipo de circunstancias, nunha situación tan crítica, non deben de respectarse senón que  deben de acelerarse”.

Apuntou que debido a esta lentitude, “estamos vendo como os colectivos afectados pola alza dos prezos aínda están esperando que se publiquen no Diario Oficial de Galicia as medidas anunciadas por Feijoo”. Deste modo, “ademais de escasas, non son efectivas porque non acaban de entrar en vigor”.

Formoso contrastou esta situación coas accións tomadas polo goberno central, que a diferenza da Xunta, si as publicou no Boletín Oficial do Estado e, polo tanto, “xa son efectivas”. Nesta liña o secretario xeral do PSdeG lembrou que, por exemplo, “a xente xa está desfrutando nas gasolineiras e nas estacións de servizo, sobre todo os colectivos afectados, das rebaixas fiscais nos prezos dos gasóleos e dos combustibles”.

En cambio, censurou que “a adopción de medidas por parte do goberno galego, ademais de seren poucas, nin sequera se puxeron en marcha”.