A portavoz de Urbanismo do Grupo Socialista, María Pierres, alertou de que “o grao de abandono –da política de vivenda por parte da Xunta- é tal que está pasando de preocupante a escandaloso”. Así o dixo no debate dunha proposición non de Lei para reclamar o impulso dos orzamentos para erradicación da infravivenda que foi debatida hoxe no Pleno do Parlamento e que será votada mañá mércores.

A responsable socialista criticou a redución das partidas do goberno galego para erradicación da infravivenda a través do Plan Rehavita, que no mellor dos casos só chegarían a 4 euros para cada unha das 47.400 vivendas que non reúnen as condicións mínimas para vivir. Pierres sinalou que aquel Plan, ademais de estar limitado a concellos de menos de 10.000 habitantes, pasou de 500.000 euros en 2017 a tan só 200.000 en 2019.

Censurou un “programa máis de lavado de cara” que supón un máis dos “fracasos e dimensións perdidas no camiño do goberno presidido por Feijóo en materia de vivenda”, con apenas 34 actuacións en tres anos para só 19 concellos. Advertiu que hoxe en día hai en torno a 149.000 galegos e galegas, o 5,5 por cento da poboación, que residen nunha vivenda inadecuada, de acordo co informe sobre exclusión e desenvolvemento social en Galicia da Fundación Foessa.

Estes “milleiros de galegos e galegas –dixo- habitan vivendas con instalacións, cerramentos ou estruturas precarias, sen calefacción, sen electrodomésticos, sen illamento ou fiestras que eviten as pontes térmicas ou sen impermeabilizacións eficaces”. Trátase de vivendas que non reúnen as condicións mínimas para vivir, sofren de deficiencias graves na construción ou están en estado de ruína, e mesmo carecen de subministros e dotacións de hixiene e salubridade adecuados.

Iniciativa

María Pierres presentou así unha proposición non de Lei para reclamar o impulso e reforzo da partida para o programa de axudas para erradicación das infravivendas do Plan Rehavita, “facéndoo extensivo e accesible a tódolos concellos de Galicia, favorecendo a mellora das condicións básicas de habitabilidade de a lo menos 300 fogares ao ano”.

Tamén reclamou “traballar por mellorar os mecanismos de detección dos casos de infravivenda, co fin de dotar aos concellos dunha ferramenta que lles permita planificar mellor as súas políticas de vivenda e o destino das axudas de carácter autonómico”.