Alerta de que a fala de Plans de ordenación provoca que “perdamos unha oportunidade de riqueza”

A portavoz de Política Forestal do Grupo Socialista, Carmen Rodríguez Dacosta, acusou ao goberno galego de “desperdiciar” a riqueza que supoñen os montes veciñais de man común, que supoñen un terzo da superficie forestal galega. Dacosta presentou unha pregunta oral na Comisión de Agricultura do Parlamento na que advertiu que “a Xunta está perdendo a oportunidade de que o monte galego sexa unha fonte de riqueza”.

A responsable socialista acusou ao goberno galego de abusar das moratorias aos convenios e consorcios, que deberan ter cancelado no ano 2015 para implantar contratos temporais de xestión pública ou ben cancelarse, pero que seguen adiando, agora ata decembro deste ano. Reclamou que muden o modelo cara os novos contratos que poñan en valor o monte e permitan utilizalo como foco de emprego e para o repoboamento do rural.

Advertiu que a Lei obriga a aprobar plans de ordenación que permitan unha planificación intelixente do monte e impoñer a xestión forestal sostible que supere o modelo caduco do goberno galego, baseado en repoboacións con especies de crecemento rápido e escasa calidade. Urxiu a poñer en valor un monte multifuncional, que permitan a preservación da masa forestal e, en definitiva, impulsar a riqueza forestal de Galicia.

Acusou ao goberno galego de deixar o monte “á súa sorte”, mantendo un modelo “obsoleto” que impide empregar este recurso “á altura da súa potencialidade”, e que ademais do beneficio económico funcione como regulador das anomalías climáticas e da loita contra o lume.

Denunciou que o goberno galego leva anunciando dende 2022 unha nova Lei que regule os montes veciñais que “durme nos caixóns da Consellería do Medio Rural”. Esixiulle así á Consellería de Medio Rural que presente a norma dunha vez e comece por realizar un informe sobre a situación real destes montes e que constitúa o Consello de Montes Veciñais en Man Común, tal e como figuraba nas conclusións da Comisión de estudo da Política Forestal dende o ano 2018.