O secretario xeral do PSdeG valorou o acordo que os socialistas promoveron no Parlamento: “Demos o primeiro paso para un pacto de país, que a cociña saudable volva aos colexios”

“Queremos que a comida das escolas aprobe e non suspenda como ocorre hoxe con demasiada frecuencia, porque non estamos alimentando ben aos nenos e nenas”, afirmou o  líder socialista

O secretario xeral do PSdeG, José Ramón Gómez Besteiro, defendeu hoxe na Coruña os alimentos de proximidade, porque, entre outros beneficios, “son máis saudables e poñen en valor o noso”, e advertiulle á Xunta que eses produtos “deben ter máis protagonismo nos comedores públicos”, tanto de centros educativos coma hospitalarios ou residencias. O líder socialista visitou a escola municipal A Caracola, unha instalación municipal situada en Novo Mesoiro e pioneira da rede EcoComedores, destinada a introducir alimentos ecolóxicos e de tempada servidos por produtores locais e na que participan a Fundación Juana de Vega e a Reserva da Biosfera das Mariñas Coruñesas e Terras do Mandeo.

O tamén portavoz do Grupo Socialista no Parlamento de Galicia explicou que, hai pouco máis dun mes, o PSdeG acadou a unanimidade dos partidos representados na Cámara autonómica para que o Goberno galego inclúa os produtos de quilómetro cero entre as condicións valorables nas súas licitacións, “tal como xa acontece en outras comunidades autónomas”. “Demos o primeiro paso para un pacto de país, que a cociña saudable volva aos colexios”, asegurou. Nese eido concreto, un dos obxectivos máis importantes é facer fronte aos problemas de sobrepeso “que xa afectan a un terzo dos nenos e nenas galegos”.

“Queremos que a comida das escolas aprobe e non suspenda como ocorre hoxe en día con demasiada frecuencia”, afirmou Besteiro, que lamentou as frecuentes queixas que se producen entre as familias pola deficiente alimentación que existe en moitos centros de ensino. Por outra banda, remarcou que apostar polos produtos locais, frescos, de tempada e ecolóxicos non só reporta beneficios aos consumidores, senón que tamén llos proporciona “á xente que se dedica á agricultura, a gandería e ao mar” e, en xeral, á economía de Galicia.

“Por iso lle esiximos a Rueda cambios no sistema de adxudicación dos comedores públicos”, dixo o secretario xeral socialista, que apuntou, entre esas modificacións, “un pago digno para a elaboración das comidas e apoio á loxística de proximidade”, imprescindibles para que a contratación “faga medrar o noso sector primario” ao tempo que repercute positivamente no medio ambiente. “Obrigando a que se empreguen envases retornables, por exemplo, xeraríanse menos plásticos dun só uso e favoreceríase aos provedores da contorna”, argumentou.

Besteiro percorreu a escola infantil A Caracola na compaña das deputadas Patricia Iglesias e Silvia Longueira, o concelleiro de Educación da Coruña, Juan Ignacio Borrego, e o secretario provincial do PSdeG, Bernardo Fernández Piñeiro. Alí reuniuse tamén co vicepresidente da Asociación de Desenvolvemento Mariñas-Betanzos, e alcalde de Paderne, Sergio Platas; a directora da escola, Beatriz Ferreira; o director da Fundación Juana de Vega, José Manuel Andrade Calvo; e técnicos desta última entidade e do Concello, ademais de representantes dos produtores, de entidades como Ecoagra e Renacer.

Nas instalacións, o líder socialista puido compartir uns intres cos nenos e nenas durante a hora de comedor e coñeceu a elaboración dos menús. En declaracións durante a visita a un centro que cualificou de “pioneiro”, insistiu no “problema serio” que ten Galicia coa obesidade infantil, cunha incidencia do 8 % a partir dos seis anos de Idade. “Alimentar ben tamén é unha responsabilidade pública. E facelo con produtos locais e ecolóxicos é unha forma de educar en valores e coidar da saúde colectiva”, dixo.

A situación de Sargadelos “é reversible, como se demostrou”

A preguntas dos medios, Besteiro reiterou que a situación da fábrica de Sargadelos en Cervo, ameazada de peche polo seu administrador, “é reversible, tal como se demostrou”. Porén, indicou que a Xunta “ten que poñerse á fronte” para que unha industria tan representativa de Galicia manteña a súa actividade, corrixa calquera deficiencia e incluso “siga na mesma liña de crecemento” que levaba.

Para o líder socialista, un hipotético peche “non respondía á realidade da empresa”, e sinalou que, a partir de agora, “hai que estar pendente” da situación e buscar solucións para calquera problema que xurda en materia de prevención de riscos laborais, “que tamén é responsabilidade da Xunta.

Saúdos, comunicación PSdeG-PSOE