O candidato socialista á presidencia da Xunta subliñou dende Viveiro que a execución da VAC de Ferrol a San Cibrao, estratéxica para a mobilidade e o desenvolvemento da comarca, “será prioritaria na nova etapa de Goberno que lideraremos os socialistas en Galicia”

Besteiro comprometeuse a recuperar o tempo perdido: “A VAC Costa Norte, anunciada en 2001, tiña que estar rematada en 2007, pero o PP abandonouna nun caixón ata que chegou o Goberno de Touriño, que licitou os únicos dous tramos rematados ata o momento: as variantes de Xove, inaugurada en 2017, e a de Ortigueira, en 2013. Dende entón o PP tena parada”

José Ramón Gómez Besteiro, candidato do PSdeG á presidencia da Xunta,anunciou este xoves que a Vía de Alta Capacidade Coste Norte será a primeira obra que fará na comarca da Mariña cando chegue á presidencia da Xunta. “O PP deixou tirada á Mariña. Nestes case 15 anos, nin Feijóo nin Rueda moveron un dedo pola Vía de Alta Capacidade Costa Norte de Ferrol a San Cibrao. Non fixeron nin un metro máis dos que deixou en marcha o Goberno de Pérez Touriño”, engadiu o socialista, quen avanzou que esta obra “será prioritaria na nova etapa de Goberno que lideraremos os socialistas en Galicia”.

“Recuperaremos o tempo perdido, e faremos o que non fixeron nin Feijóo, nin Rueda durante estes anos, nos que puxeron en pausa esta infraestrutura clave, como tantas outras en toda a provincia de Lugo e en toda Galicia”, asegurou Gómez Besteiro. “Os socialistas darémoslle solución, como facemos sempre, arranxar os problemas e impulsar os investimentos para avanzar”.

Besteiro reivindicou o impulso da VAC Costa Norte no encontro que mantivo esta mañá en Viveiro coa alcaldesa, María Loureiro, co secretario xeral do PSdeG na provincia de Lugo e presidente da Deputación, José Tomé Roca, ca deputada autonómica Patricia Otero, o senador César Mógo, e alcaldes e alcaldesas, e voceiros socialistas da comarca da Mariña. O encontro tivo lugar na travesía da cidade do Landro, onde se producen habitualmente retencións de tráfico provocadas pola elevada densidade da circulación, que precisamente evitaría a variante da Vía de Alta Capacidade que a Xunta ten paralizada.

Os únicos tramos feitos son obra dos socialistas

O candidato do PSdeG á Xunta lembrou que a VAC Costa Norte, anunciada polo Goberno presidido por Fraga e con Xosé Cuíña como Conselleiro en 2001, tiña que ter rematado en 2007, pero foi abandonada nun caixón ata que chegou o Goberno presidido polo socialista Pérez Touriño, que licitou os únicos dous tramos rematados ata o momento. Trátase da variante de Xove, en Lugo, inaugurada en 2017, e a variante de Ortigueira, inaugurada en 2013.

Dende entón, o PP tena parada porque ano tras ano consigna partidas económicas nos
Orzamentos da Xunta que nunca executa. En vez de desbloquear os 9 tramos que aínda quedan pendentes, o Goberno galego mesmo tratou de responsabilizar á Alcaldesa viveirense, que tivo que adaptar o PXOM á modificación imposta pola Xunta e coa que racharan o consenso no proxecto orixinal para a Ponte de Viveiro. Unha mera escusa, como demostra que, nunha recente resposta aos socialistas no Parlamento de Galicia, o director da Axencia de Infraestruturas recoñeceu que a VAC Costa Norte non é prioritaria para o PP.

Todo un cúmulo de “despropósitos” que “agrava aínda máis o menosprezo ao que Rueda somete aos veciños e veciñas da Mariña”, tanto en infraestruturas, como tamén en materia industrial, porque, “non nos esquezamos da tripla traizón que lle fixeron aos mariñáns, con Alcoa, con Vestas e con Altri”.

A paralización da Vía de Alta Capacidade Costa Norte “é un exemplo máis de que, co PP, esta comarca, a provincia de Lugo e toda Galicia perderon moito nestes preto de 15 anos. Non podemos perder máis tempo. Co PP, Galicia para; cos socialistas, Galicia avanza, como estamos a demostrar no Goberno do Estado con Pedro Sánchez, o presidente que máis fixo por Galicia, e tamén nas deputacións e nos concellos liderados por socialistas.

“Gobernos con ambición, con ganas e con proxecto para mellorar a vida da xente con máis servizos e con máis infraestruturas. Un Goberno como o que ofrecemos os socialistas para Galicia”, concluíu o deputado por Lugo.