Begoña Rodríguez cuestiona a “eficacia e eficiencia” da fusión de concellos promovida pola Xunta: “Os fusionados dispoñen dun sobrefinanciamento e o resto teñen falla de recursos para poder ofrecer servizos á cidadanía”
Paloma Castro alerta sobre o “grave déficit” de socorristas en Galicia “provocado polos regulamentos do sector que impón a Xunta”
31/03/2021
O secretario de Organización aposta pola “coordinación íntegra” do PSdeG co novo delegado do goberno e chama a todo o partido a “volcarse” fronte á crise
31/03/2021
Critica os “convenios a dedo” que asina a Xunta con concellos gobernados polo Partido Popular
A deputada socialista Begoña Rodríguez Rumbo vén de cuestionar a “eficacia e eficiencia” da fusión de concellos promovida pola Xunta, xa que “os fusionados dispoñen dun sobrefinanciamento e o resto teñen falla de recursos para poder ofrecer mellores servizos á cidadanía”. Fíxoo, hoxe, en Comisión de Administración Xeral no Parlamento a través dunha pregunta ao goberno galego.
Rodríguez Rumbo lamentou que “para reforzar a medida estrela do presidente Feijóo” da fusión dos concellos, nos orzamentos da Xunta dende 2016 a 2021, “achegáronse recursos aos concellos fusionados por case 11,5 millóns de euros, fronte á conxelación do Fondo de Cooperación Local para os demais municipios galegos” que reciben 113 millóns de euros, “fondo no que, por certo, tamén entran os dous concellos fusionados” e cuxa contía “non se incrementou nin un euro en 11 anos”.
“Amais, a estes 11,5 millóns de euros que aparecen nominalmente nos orzamentos da Xunta, hai que sumarlle a cantidade de convenios subscritos con estes dous concellos con practicamente todas as consellerías do goberno galego, así como da maior puntuación de partida en todas as convocatorias de subvencións do goberno autonómico”, sentenciou.
Por todo isto, a socialista recordou que malia que “o Grupo Socialista non está en contra das fusións”, si o está “de determinadas formas de facelas”. “A fusión de municipios non é a solución a todos os problemas”, sentenciou.
Nesta liña, a responsable socialista cuestionou a consecución de obxectivos desta política da Xunta, xa que o “pretendido descenso demográfico” nos concellos fusionados ata o de agora non foi tal. De feito, lamentou que Oza-Cesuras “está a piques de baixar dos 5.000 habitantes”, xa que 7 anos despois da fusión, a poboación caeu en 239 habitantes e, no caso de Cerdedo-Cotobade, “a situación é similar” cando catro anos despois da fusión, dispón de 374 habitantes menos.
Finalmente, a deputada socialista criticou os “convenios a dedo” que asina a Xunta de Galicia con concellos gobernados polo Partido Popular en detrimento das axudas que poidan recibir outros municipios gobernados por outros partidos de distinta cor política.
