O secretario xeral do PSdeG-PSOE salienta que a reforma aprobada onte supón “un avance claro dos dereitos dos galegos e das galegas e menos  precariedade e temporalidade” para os traballadores e traballadoras galegos

O secretario xeral do PSdeG, Valentín González Formoso, sinalou hoxe que a cidadanía está “estupefacta” de que o goberno galego critique a reforma laboral “que supón un avance claro nos dereitos dos traballadores e da traballadoras”. Subliñou dende Burela que “non entendemos como poden non alegrarse e non apoiala”.

O líder dos socialistas galegos apuntou que o avance de onte “debera ser aplaudido por todo o mundo”, mentres o PP opta por “votar no Congreso en contra” dunha norma que “supón menos precariedade e menos temporalidade para os traballadores e as traballadoras de Galicia”. Engadiu que “a lo mellor non son todos os avances aos que aspiramos, pero en todo caso trátase dun avance”.

Salientou que “sobre todo, por canto recupera unha senda de diálogo social entre os axentes que representan a todo o tecido produtivo galego e español”. Apuntou ao acordo entre “grandes, medianos e pequenos empresarios, e tamén os traballadores e traballadoras, a través das súas organizacións representativas, tanto empresariais como sindicais”.