Aféalles que tardaran “unhas horiñas” en descolgarse do acordo para transferir a AP-9 e apunta que “os socialistas non pararemos de traballar ata que consigamos a gratuidade desta infraestrutura”

A secretaria de Transportes e Mobilidade Sostible do PSdeG e parlamentaria no Congreso, Patricia Otero, lamentou hoxe que PP e BNG tardaran “unhas horiñas” en descolgarse do acordo para iniciar o trámite parlamentario da transferencia da AP-9. Nun acto sobre infraestruturas en Lugo, Otero criticou que os dous partidos “fan que discuten en Galicia, pero pactan en Madrid, non para beneficiar aos galegos e galegas, senón para confrontar co goberno e confundir á cidadanía”.

Así o dixo logo da proposta do BNG aprobada onte co apoio do PP no Congreso, coa que “se descolgan do acordo” para aprobar a toma en consideración da Lei de Transferencia da AP-9 e pasara a pedir “todo o contrario”. Afeoulles que “os que se opoñían frontalmente á construción da AP-9 -que era o BNG-, e os que regalaron a concesión durante máis de 25 anos -o PP-, queren converterse nos defensores a ultranza desta infraestrutura”.

Advertiu que “o que realmente lle interesa aos galegos e galegas é que se sigan a rebaixar as peaxes da AP-9”, e asegurou por iso que “os socialistas non pararemos de traballar ata que academos a gratuidade desta autoestrada”. Sinalou que “o demais son trucos para confundir e enganar á cidadanía” por parte de PP e BNG que, remachou, “nunca miraron para os petos das galegas”.

Explicou que os socialistas galegos “vemos ben a transferencia da AP-9”, pero “vemos aínda mellor que se sigan a rebaixar as peaxes e que poidamos chegar a circular por esta infraestrutura cun custe de 0 euros”. Esa é a liña de traballo do goberno presidido por Pedro Sánchez, que “puxo enriba da mesa e aplicou unhas bonificacións históricas” ás que se opuxeron tanto PP como BNG cando votaron contra os Orzamentos de 2021 nos que se incluíron por primeira vez.

Reivindicou a xestión do goberno de Sánchez, que implantou a gratuidade da viaxe de volta, ou o 20 por cento adicional de rebaixa para os viaxeiros recorrentes mentres, lamentou, “semella que outros están a confrontar”. Puntualizou que “os socialistas seguiremos a traballar para aforrarlle cartos aos galegos e galegas e para que se sigan a ampliar as bonificacións, que é o que realmente lle interesa aos usuarios” da autoestrada.