Defende un novo modelo de desenvolvemento “xusto e inclusivo no conxunto do país”

A portavoz de Industria do Grupo Socialista, Patricia Iglesias, presentou no Parlamento un Pacto polas Enerxías Renovables e a Industria para afrontar a transición ecolóxica con consenso e facer ao conxunto da cidadanía “partícipe dos seus beneficios”. Lamentou que o PP rexeitara a man tendida polos socialistas galegos para chegar a un acordo de mínimos e optara por “botar balóns fora e non asumir a súa responsabilidade política”.

Iglesias presentou unha proposición non de Lei no Pleno do Parlamento para acordar un “novo modelo de desenvolvemento xusto e inclusivo no conxunto do país que permita “pasar á acción, ordenar, dotar ao sector de seguridade xurídica e aprobar un novo Plan do Sector Enerxético”. Urxiu a mapear e clasificar as zonas de desenvolvemento das renovables, sinaladamente a eólica, afectada polo “caos” na xestión da Xunta, que provocou a paralización de máis de 40 parques.

Criticou que o PP rexeitara esta proposta, demostrándose como “o principal responsable de que Galicia non teña unha boa planificación do seu potencial enerxético” e renunciando a facer unha mínima autocrítica pola súa “nefasta xestión”. Criticou o empecinamento dos de Rueda en seguir o camiño que iniciaron coa supresión do Plan Eólico en 2009, co que deixaron fóra do mercado 2.325 MW e obrigaron aos galegos e galegas a pagar as indemnizacións millonarias pola suspensión.

Modelo respectuoso

Defendeu un modelo de enerxías renovables planificado e ordenado, que sexa “respectuoso co medio, co ecosistema, co patrimonio cultural, coas comunidades locais e que teña en conta os efectos socioeconómicos e que poña en valor o noso vento e a nosa auga”.

Advertiu que “tan insensato é pretender o desenvolvemento indiscriminado de toda a potencia eólica solicitada en Galicia como optar pola prohibición total de novos desenvolvementos de enerxía eólica”. Criticou así a postura do BNG, “cómodo” na oposición e na negación, pero “incapaz de aportar unha proposta de enerxías renovables realista e viable”, etiquetando todo proxecto como “espolio enerxético” e propoñendo unha tarifa galega “inviable e inconstitucional”.