Critica que o goberno galego incumpre de forma sistemática as recomendacións do Consello de Contas

A portavoz de Calidade Democrática e Transparencia do Grupo Socialista, Patricia Iglesias, denunciou hoxe que a Xunta leva 14 anos incumprindo coa obriga de crear un rexistro das entidades dependentes que figura na Lei de Funcionamento da Administración de Galicia -Lofaxga- de 2010. Iglesias lamentou o voto en contra do PP á iniciativa que presentou hoxe para mellorar a transparencia e información relativa a estas entidades.

A responsable socialista deulle un “suspenso” ao goberno galego en materia de “integridade, bo goberno e plus de legalidade” ao negarlle unha “información veraz e íntegra” á cidadanía, e esixiulles que “garantan o bo goberno, a integridade, a honestidade e facer o correcto cando ninguén está a mirar”.

Iglesias afeoulles o incumprimento sistemático das recomendacións do Consello de Contas, que foron incorporadas á proposta debatida hoxe e que o PP de novo rexeitou. Lembrou que o ente fiscalizador está a dar a alarma informe tras informe das eivas do goberno galego en canto á identificación das entidades instrumentais e a falla de transparencia na contratación por parte delas, e alertando ademais da opacidade na rendición de contas polo goberno galego.

Acusou ao PP de “ir en contra das recomendacións do Consello de Contas” ao rexeitar a iniciativa presentada hoxe na Comisión Institucional do Parlamento, na que presentaba mecanismos para mellorar a transparencia en relación coa contratación das entidades do sector público autonómico.