Alerta de que Galicia pode perder 5,8 millóns de euros de fondos se a Xunta non pon en marcha os centros antes de 2025

Reclámalle ao goberno galego a que poña en marcha un Plan urxente contra a violencia de xénero centrado na prevención e na educación

A portavoz de Igualdade do Grupo Socialista, Paloma Castro, urxiu hoxe ao goberno galego que poña en marcha canto antes os centros de crise 24 horas de atención ás vítimas de violencia sexual. Castro interveu na comparecencia do director xeral de Loita Contra a Violencia de Xénero, na que alertou de que o goberno galego está en risco de perder 5,8 millóns de euros de fondos europeos se non pon en marcha estes centros antes de 2025.

A responsable socialista alertou do prexuízo que suporá a perda deste investimento, asignado a Galicia polo goberno central, non só polo diñeiro que supón, senón porque suporá furtarlle ás vítimas de violencia sexual un recurso fundamental. Advertiu que neste momento a primeira asistencia ás vítimas de violencia sexual “non é adecuada” en Galicia por falta de protocolos ou descoñecemento dos mesmos, pola saturación do servizo ou por mera descoordinación coa policía.

Neste sentido, reclamoulle á Xunta que desenvolva canto antes un Plan urxente contra a violencia de xénero centrado na prevención e na educación, que incorpore campañas de información e sensibilización sobre violencia machista e recursos para a súa identificación, así como e servizos dispoñibles aos que as posibles vítimas poidan acudir. Tamén pediu o incremento de programas de formación en igualdade e prevención da violencia machista na sanidade, educación ou xustiza.

Urxiu a elaborar un protocolo específico “que constitúa unha guía sinxela e clara, para que os membros da comunidade educativa dispoñan duns criterios orientadores e uns procedementos de actuación claros e completos diante de posibles casos de abuso sexual a menores”. Castro defendeu a implantación seria e obrigatoria da educación sexual nos ciclos de Infantil e Primaria, o control de acceso á pornografía e a abolición da prostitución.

A responsable socialista alertou do incremento progresivo de casos de violencia de xénero no Estado e tamén en Galicia, con 163 casos máis entre 2022 e 2023, que obrigan a reforzar e incrementar as medidas postas en marcha para protexer ás vítimas.

Reclamou campañas dirixidas aos homes de 41 a 64 anos, que coinciden co perfil de agresor, incorporando o tratamento terapéutico e seguimento dos agresores reincidentes no eido xurídico e, no plano social, sinalando e condenando calquera banalización das agresións sexuais.

Castro comezou a intervención lembrando o desacordo claro dos socialistas galegos coa decisión do goberno galego de relegar as políticas de Igualdade á categoría de Dirección Xeral, separándoas ademais da Violencia Sexual. Advertiu que a violencia de xénero “é unha consecuencia da sociedade desigual na que vivimos homes e mulleres”, polo que, sinalou, “non deben actuar de forma independente, senón que teñen que ter á Secretaría Xeral como nexo común.