A viceportavoz do Grupo Socialista Paloma Castro reclamoulle hoxe á Xunta que incremente o persoal dos equipos de valoración da Dependencia “para evitar retrasos nas xestións, pagos ou listas de agarda”. Castro defendeu en Comisión esta pregunta asinada tamén pola portavoz de Política Social, Marina Ortega, logo dos retrasos detectados hai meses no pago das libranzas de coidados na contorna familiar.

A parlamentaria socialista advertiu que “moitas destas familias dependen destes ingresos para poder facer fronte por exemplo a pagos farmacéuticos ou gastos extraordinarios derivados de ter un familiar a cargo”. Reclamoulle ao goberno galego que poña sobre a mesa as medidas previstas para solventar estes atrasos non só nos pagos das libranzas, senón nos tempos de resolución das valoracións do grao de dependencia, así como nos PIA e nos PAR.

Castro considera “fundamental” neste punto o aumento de persoal tanto nos equipos de valoración coma nos encargados de resolver os programas individuais de atención –PIA- e o Programa de Asignación de Recursos –PAR-. Lembrou o incremento de 45 millóns de euros na aportación do goberno de España a través do Plan de Choque da Dependencia, e dixo que “deberan aumentar o persoal para cumprir as expectativas xeradas polo propio Feijóo neste aspecto”.

Lembrou que o propio presidente da Xunta presentou este Plan de Choque suporía a reforma máis ambiciosa do sistema de atención á Dependencia dende a súa creación. Reclamou o incremento do persoal para evitar uns tempos de agarda que hoxe máis que duplican o tempo fixado por Lei para as xestións, en boa parte debido aos recortes na Dependencia aplicados polos gobernos do PP dende o Decreto Lei de 2012, que afectou sinaladamente ás libranzas na contorna familiar.

Subliñou que, malia que os datos de agardas poidan mellorar de forma conxuntural, é porque “moita xente deixou de solicitar residencias e horas do Servizo de Atención ao Fogar –SAF- por mor da covid”, ou polas valoracións telefónicas impostas pola Xunta.

Sinalou que “se trata dun espellismo derivado das consecuencias da pandemia e dunha decisión da Xunta que está a provocar o evidente empeoramento nas valoracións, que non poden ser valoradas por teléfono”. Explicou que estas “corresponden a patoloxías que derivan nunha dependencia para a realización de actividades básicas na vida diaria”.