A parlamentaria socialista Paloma Castro reclamoulle hoxe á Xunta que garanta que o Parque eólico Campo das Rosas, non concello de Cerdedo – Cotobade, cumpra cos requisitos medioambientais. A responsable socialista visitou o Concello, onde mantivo un encontro cos veciños que lle trasladaron a súa preocupación pola falla de información diante deste proxecto, actualmente en fase de alegacións.

Castro respaldou o impulso á enerxía renovable, pero sinalou que “esta transición debe ser xusta coa veciñanza e co territorio”, e advertiu fronte á “barra libre do PP en relación coa proliferación de parques eólicos en Galicia. Defendeu “a harmonía entre estes e o respecto ao medio ambiente, o interese paisaxístico dos diferentes territorios e a calidade de vida da veciñanza dos entornos máis rurais”.

A responsable socialista lamentou a falla de transparencia do goberno galego e do propio Concello con relación á xestión e á información sobre este parque, e insistiu na necesidade de garantir o equilibro na negociación entre os propietarios dos terreos e as empresas de xestión dos parques, de forma que os beneficios económicos tamén revertan nas poboacións afectadas.

Alegacións

A portavoz socialista no Concello, Lina Garrido, anunciou as alegacións que presentarán os socialistas para garantir que o parque cumpra coa normativa medioambiental, e alertou do fraccionamento simulado do proxecto para eludir os requisitos medioambientais.

Tamén alertará das afeccións aos cursos de auga, o impacto sobre o patrimonio cultural inmaterial e natural, sinaladamente sobre a Rapa das Bestas de Sabucedo, a proximidade dos aeroxeradores ás vivendas.