Destacou a urxencia da posta en marcha medidas para combater a pobreza estrutural, que afecta a máis de 100.000 menores galegos en risco de pobreza ou exclusión. “Non podemos seguir cos mesmos recursos mentres as familias máis vulnerables quedan abandonadas a súa sorte”, sinalou a socialista, reclamando o fortalecemento dos equipos de inclusión social

A parlamentaria socialista Paloma Castro interveu hoxe na Comisión de Política Social para cuestionar á Conselleira sobre a proposta orzamentaria para o próximo ano. Na súa intervención, Castro salientou a falta de compromiso por parte do Goberno galego en áreas clave como a inclusión social, a atención á infancia ou a igualdade de xénero, e esixiu unha resposta máis firme fronte ás necesidades sociais de Galicia, que se enfronta a niveis de vulnerabilidade cada vez maiores.

Castro destacou a urxencia de por en marcha medidas para combater a pobreza estrutural que, segundo os últimos datos, afecta a máis de 100.000 menores galegos en risco de pobreza ou exclusión. “Non podemos seguir cos mesmos recursos mentres as familias máis vulnerables quedan abandonadas a súa sorte”, sinalou a socialista, reclamando o fortalecemento dos equipos de inclusión social.

Cuestionou así mesmo a falta de avances lexislativos e normativos para desenvolver a Lei de Inclusión de Galicia e destacou a falta de compromiso coa Renda de Inclusión Social de Galicia (RISGA), solicitando que se complemente co Ingreso Mínimo Vital para mellorar a protección das familias máis vulnerables.

“É irresponsable que se limite o acceso a axudas de dependencia con listas de espera interminables”, criticou, facendo fincapé en que Galicia inviste menos por habitante en situación de dependencia que outras comunidades.

A parlamentaria socialista insistiu na necesidade de elevar a Igualdade a un nivel de transversalidade real en todas as políticas da Xunta e lamentou que, malia os fondos asignados no Pacto de Estado contra a Violencia de Xénero, estes se empreguen de xeito inadecuado: “Non imos permitir que se gasten en actividades alleas ao obxectivo real de combater a desigualdade”, afirmou Castro.

A socialista tamén criticou a inacción na educación en igualdade e a falta de recursos para atención psicolóxica ás vítimas de violencia. “A educación afectiva e sexual é fundamental para previr futuras agresións, e o Goberno galego non está a actuar”, engadiu.

Emigración xuvenil

Castro advertiu sobre o problema crecente de emigración xuvenil debido á precariedade laboral e ao difícil acceso á vivenda en Galicia. Pediu á Consellería maior compromiso para impulsar políticas que melloren a oferta de vivenda accesible e estabilidade laboral, evitando así outro pico migratorio entre a mocidade galega.