Acusa á Xunta de castigar aos concellos que cumpren cos requisitos de reciclaxe, recuperación e reutilización ao retirar o canon bonificado de Sogama

A portavoz de Medio Ambiente do Grupo Socialista, Paloma Castro, censurou hoxe a xestión de residuos da Xunta, que “está, como se di, a velas vir”, centrada na incineración e o vertedoiro contra tódalas directrices da UE. Castro presentou unha proposición non de Lei no Pleno do Parlamento para reclamarlle á Xunta que manteña o canon bonificado de Sogama, pero que foi rexeitada porque o PP votou en contra.

Esixiulle ao goberno galego que “pare coa gran mentira de Sogama” para xustificar a suba do canon, responsabilizando ao goberno central do Imposto pola incineración e depósito en vertedoiro. Explicou en primeiro lugar que o imposto, que suporá 9 millóns de euros de ingresos, está cedido ao goberno galego, e que ademais deriva dunha directiva comunitaria obrigatoria que penaliza a quen, como Sogama, prioriza a incineración e o depósito en vertedoiro.

Paloma Castro lembrou que a xestión de residuos da Xunta a través de Sogama é contraria a tódalas directrices, xa que destina un 60,47 por cento á incineración e un 21 por cento a depósito en vertedoiro, e só un 18 por cento á reciclaxe. Advertiu que o goberno galego está a castigar aos concellos e aos veciños e veciñas pola súa negativa a mudar o modelo de xestión de residuos en contra da normativa europea, estatal e mesmo a Lei de Residuos de Galicia.

A parlamentaria socialista acusou ao goberno galego de maltratar aos concellos que cumpren cos requisitos de reciclaxe, recuperación e reutilización na súa “teima” por retirar a bonificación do canon de Sogama, que aumentará un 15 por cento baseado nunhas supostas perdas de Sogama que non existen.

Explicou que os ingresos da entidade pola venta de enerxía aumentaron un 81,31 por cento en 2023, que se suman aos beneficios pola venta de residuos tratados, e os 52 millóns de ingreso polo canon tal e como está na actualidade. Sinalou que a gran beneficiaria destes ingresos é unha empresa privada de enerxía que ten o 49 por cento da titularidade de Sogama, e que se verá beneficiada desta suba importante de ingresos e que para o goberno galego non é suficiente.

Ecopostureo

Lamentou que a Xunta evidencie o seu “ecopostureo” ao insistir de novo na retirada dunha bonificación que xa intentaran en 2023, cando deran marcha atrás logo da polémica creada cos concellos, con desautorización da conselleira do Medio Ambiente incluída, e que derivou nunha nova subvención improvisada pola implantación do contedor marrón.

A parlamentaria socialista reclamoulle ao goberno galego que manteña o canon de 66 euros por tonelada de residuos domésticos xestionada, mantendo a bonificación actual e incrementando as subvencións aos concellos para implantar medidas que contribúan á reciclaxe de biorresiduos.

Tamén reclamou que prioricen a redución e a reciclaxe fronte á incineración e depósito en vertedoiro e que amplíen as plantas de biorresiduos, tal e como estaba previsto no Plan de xestión de residuos urbanos de Galicia 2016 – 2022.