Denuncia a falta dun Plan de Igualdade que reforce a presenza feminina no corpo de policía local e alerta da falla de criterios obxectivos na formación que presta a AGASP

A parlamentaria socialista Paloma Castro alertou hoxe de que os requisitos “desfasados” impostos pola Xunta nas probas físicas para o acceso á policía local provocan unha “criba” de mulleres policías e reducen a súa presenza ao 10 por cento no corpo. Así o dixo na comparecencia do director xeral de Emerxencias para dar conta do balance de actividades da Academia Galega de Seguridade Pública -Agasp-.

Castro advertiu fronte aos criterios impostos polo goberno galego nas probas de salto, que superan en moito os das restantes comunidades autónomas e obrigan ás aspirantes galegas a achegarse a marcas de elite por exemplo nas probas de salto e velocidade.

A consecuencia deste baremo “desactualizado” é que a presenza de mulleres na policía local redúcese a apenas o 10 por cento, provocado pola falta dun Plan de igualdade que garanta o aumento da participación feminina como xa se fixo noutros corpos policiais no Estado.

Advirte que “non existe un Plan de Igualdade que permita incrementar a participación feminina”, o cal é un incumprimento da lexislación autonómica en materia de igualdade”. Paloma Castro lembrou que esta normativa eixe a incorporación da perspectiva de xénero en tódolos procedementos de acceso a cargos.

Falta de criterios obxectivos

Apuntou ademais á falla dun Plan que estableza criterios obxectivos na formación que está a prestar a Agasp, que carece de criterios para as persoas que dan a formación duns cursos que carecen de continuidade ou criterio formativo, mentres a propia Agasp delega cursos en academias privadas que son designadas sen ningún criterio coñecido. Apuntou que tampouco existe “ningún convenio coa Universidade que poida convalidar as horas de formación” que presta a Academia.

Paloma Catro esixiulle ao director xeral que garanta unha formación regulada, en base a parámetros coñecidos e a través de titores e formadores escollidos en base a criterios obxectivos. Explicou que estes requisitos garanten que tódolos profesionais que participen neste tipo de dispositivos conten coa formación necesaria e as ferramentas axeitadas para desenvolver o seu traballo coas máximas garantías.