Reclama unha actuación transversal que abrangue o impulso do deporte feminino, a concienciación á sociedade ou a imaxe pública para “facer real a igualdade no deporte”

A portavoz de Igualdade do Grupo Socialista, Paloma Castro, advertiu que o goberno galego non inclúe “nin un só euro” para o impulso do deporte feminino nos orzamentos de 2024. A responsable socialista presentou unha proposición non de Lei no Pleno do Parlamento para reclamar unha actuación transversal que inclúa o impulso do deporte feminino, a concienciación da sociedade e a imaxe pública nos medios, e que será votada mañá.

Castro criticou que a actuación do goberno galego para o impulso do deporte feminino “queda en declaracións de vontade” ao negarse a incorporar “ningún tipo de partida” nos Orzamentos, en contra mesmo das emendas do Grupo Socialista, que pedía unha partida de 1,5 millóns de euros para cumprir coa Lei para a Igualdade efectiva de mulleres e homes de Galicia.

A parlamentaria socialista reivindicou a decisión dos socialistas galegos de concederlle o premio Maruja Vázquez de Igualdade deste mesmo ano ás futbolistas galegas Vero Boquete e Paula Dapena como recoñecemento ao seu papel no deporte e a favor da igualdade de mulleres e homes. Subliñou que as e os socialistas de Galicia escolleron a dúas deportistas que teñen “dado a cara para defender a igualdade, converténdose en exemplos e referentes para moitas outras mulleres”.

Explicou que este recoñecemento é concedido “dende a humildade pero marcando o camiño” para a concienciación da cidadanía nun obxectivo que é “de xustiza” cando a día de hoxe, sinalou graficamente, “as nenas que queren xogar ao fútbol se atopan con que a maioría dos campos carecen de vestiario feminino e teñen que utilizar os dos árbitros”.

Advertiu que as mulleres, tamén no deporte, “están aínda lonxe de ocupar un espazo que lles pertence”, cando en Galicia tan só o 23,76 por cento dos e das 281.561 deportistas federados son mulleres. No caso concreto do fútbol, sinalou, a porcentaxe de mulleres federadas tan só supera lixeiramente o 7 por cento.

Explicou que con esta iniciativa quere reivindicar que o impulso do deporte feminino sexa un asunto prioritario, e constitúa unha “auténtica política de Estado”, como apuntaba o propio presidente do goberno, Pedro Sánchez.