Insta ao goberno galego a “deixarse de lamentos e poñerse as pilas” para instaurar a recollida separada de biorresiduos e cumprir os obxectivos de reciclaxe

A voceira de Medio Ambiente do Grupo Socialista, Paloma Castro, lamentou hoxe “a obstinación” da Xunta de Galicia ao non atender as advertencias do PSdeG sobre a posible inconstitucionalidade da nova Lei de residuos e solos contaminados. Esta circunstancia, tal e como se alertou en reiteradas ocasións durante a súa tramitación, obriga agora ao goberno galego a “ir a remolque” en materia ambiental e a modificar algúns dos seus artigos para adaptala ás esixencias estatais e europeas.

Xa no seu momento, Paloma Castro criticou que a nova normativa da Xunta quedaba “a medio camiño” para poder ser un instrumento “que permitise acadar unha xestión sostible de residuos” en Galicia e unha “ferramenta xurídica para dar un xiro cara o novo modelo europeo e mundial de economía circular”. Por contra, incidiu en que o proxecto de Lei era “unha maquillaxe e lavado de cara” que “non estaba aliñado coas políticas europeas”.

Paloma Castro indica que a Xunta “quixo adiantarse con esta Lei, pero non para poñela ao mesmo nivel que a estatal, senón quedando un paso atrás na xestión ambiental e de residuos”. Agora, “a conselleira de Medio Ambiente láiase por non poder acadar os obxectivos que marca a normativa europea e que tamén van estar reflectidos na estatal”, pendente de aprobación no Congreso.

Eses obxectivos, tal e como explica a deputada socialista, pasan por instaurar a recollida separada de biorresiduos nos concellos antes do 31 decembro do ano 2023. Porén, lamentou que “durante todos estes anos non se traballase nese sentido e incluso se deixase de lado esta liña, que non foi prioritaria para a Xunta”.

Nese sentido, Paloma Castro lembrou que o Plan de xestión de residuos sólidos urbanos de Galicia –que tiña un período de vixencia entre o 2010 e o 2022 e que foi actualizado no 2016- establecía a creación de 11 plantas de reciclaxe en todo o territorio galego. De feito, advertiu que “tiñan que estar construídas en 2018”, pero polo de agora o único que se sabe é que “se anuncian tres para este mesmo ano en Cervo, Verín e Vilanova”.

A situación é máis grave tendo en conta que “Sogama non  pode asumir toda esta demanda de residuos” e, polo tanto, “o goberno galego tiña que ter cumprido o Plan de xestión de residuos para poder chegar aos obxectivos que marca a Unión Europea e o goberno do Estado”. Por iso, Paloma Castro instou á Xunta a “deixarse de lamentos e poñerse as pilas” para tratar de reverter esta situación.

Nese obxectivo, a deputada socialista avoga por establecer axudas para a instalación do contedor marrón para a maioría dos termos municipais de Galicia ou activar a creación de máis plantas para o tratamento destes residuos municipais. En paralelo, Paloma Castro incide na necesidade de “potenciar as infraestruturas que xa existen, como é o caso da de Lousame, que realizan a separación dos biorresiduos en planta”

“Isto”, indica, “contribúe de maneira substancial que se cumpran os obxectivos de reciclaxe na comarca do Barbanza”. Polo tanto, convida á Xunta “a deixar a súa obstinación e a súa política de confrontación” e demándalle que colabore para garantir a viabilidade desta planta máis alá de 2023”.