Paloma Castro lamenta o voto en contra do PP a unha proposta para pedir o acondicionamento das instalacións do colexio da Illa de Arousa

A parlamentaria socialista Paloma Castro acusou hoxe a PP e Xunta de “discriminar” aos nenos e nenas da Illa de Arousa escolarizados no CEIP Torre Illa. A responsable socialista presentou unha proposición non de Lei na Comisión de Educación do Parlamento para reclamarlle ao goberno galego que faga o acondicionamento das instalacións do centro, que leva “unha década abandonado”.

A parlamentaria socialista advertiu que “non podemos permitir que se siga a discriminar aos nenos e nenas segundo o lugar onde residan”, e subliñou que esta escola da Illa de Arousa incumpre os estándares mínimos de calidade. Salientou o estado “case ruinoso” das 6 antigas vivendas dos mestres, así como os graves problemas de illamento e humidades dos 3 pavillóns dos que dispón o centro, con serios problemas nas cubertas.

Castro levou ao Parlamento as demandas do Concello, que leva “anos” reclamando unha solución para habilitar un inmoble construído nos anos 60 “sen que o exista ningunha resposta por parte do goberno galego”. Lembrou que o alcalde leva remitidas xa 5 cartas á Consellería de Educación pedindo unha xuntanza sen que lle teñan respondido, evidenciando que o Concello “sobrevive á marxe da Xunta de Galicia”.

Reclamou a reforma integral e acondicionamento integral urxente no inmoble, que inclúa a rehabilitación das 6 casas dos mestres para que poidan ser utilizadas como espazos complementarios ás aulas. Ademais, pediu o acondicionamento dos 3 pavillóns do complexo, incluíndo a reparación das humidades, a mellora do illamento, a substitución da cuberta de uralita e as actuacións necesarias para garantir a accesibilidade, ademais da substitución dos aseos.