José Manuel Miñones empraza ao PP e ao goberno galego a “deixar de mirar para outro lado” e recoñecer que o goberno do PSOE permitiu as mellores cifras de homologacións de títulos, de investimentos e de prazas de formación ofertadas na historia de Galicia

O Secretario de Sanidade e Saúde do PSdeG, José Manuel Miñones, pediulle á Xunta que utilice os fondos que lle transfire o Estado para poñer en marcha un Plan de Formación complementario para os profesionais sanitarios. O responsable socialista advertiu que os cartos transferidos polo Estado “non poden ser aforrados do Orzamento que ten a Xunta” para formación, senón que teñen que empregalos para completar a formación dos profesionais.

Criticou a “falta de transparencia” amosada polo goberno galego, que non quere informar sobre as contías de fondos propios que pon enriba da mesa para os programas de formación, e recoñecer cantos destes cartos corresponden ás transferencias do Estado. Censura que o “afán de protagonismo” do goberno galego lles impida recoñecer e “nin sequera mencionar” ao Ministerio de Sanidade por estar obsesionados polo autobombo e o márketing publicitario.

Lembra que o Ministerio de Sanidade ten posto en marcha un programa de distribución de fondos dende o ano 2021 a través do Plan de recuperación e transformación, repartindo 10 millóns de euros ás comunidades autónomas para habilitar 360.000 créditos de formación continuada para 90.000 profesionais sanitarios en todo o Estado.

Estes fondos son os que lle permiten á Xunta desenvolver horas de formación para 300 profesionais médicos de enfermaría en cirurxía menor como os que anunciou esta semana a Consellería de Sanidade sen mencionar de onde proceden os fondos. Miñones sinalou que a formación continua é fundamental para garantir unha sanidade de calidade, facilitando o acceso a novas técnicas e tecnoloxías na busca dunha maior eficiencia.

Mirar para outro lado

Miñones lamentou que o PP e o goberno galego continúen “obsesionados coa crítica e a fuxida cara adiante” para non recoñecer que o goberno do PSOE acadou as mellores cifras de homologacións de títulos, de investimentos e de prazas de formación de profesionais sanitarios da historia para Galicia. Reclamoulles que “deixen de mirar para outro lado e de culpar ao resto” e asuman a súa responsabilidade logo de 15 anos de xestión “desastrosa” da sanidade pública.

O responsable socialista lamentou que o PP se teña demostrado “incapaz de ver a realidade dos números, do que lle din as enquisas e das advertencias da Valedora e do Consello de Contas”, e que “por desgraza só lles queda a descualificación”. Respondeu así ás críticas á xestión da sanidade dende o goberno central que lanzou esta mesma semana o PP.

Lembrou que o goberno ten aprobado, baixo a súa responsabilidade como ministro, ten “aprobado tódolos acordos do Consello Interterritorial co apoio e o voto favorable de tódalas comunidades autónomas, incluso Galicia. Ademais, destinou 100 millóns de euros ao Plan de Mellora de Infraestruturas para os centros de saúde de Galicia.