O ambulatorio só ten cuberto a metade do cadro de médicos, mentres que o punto de atención continuada carece de facultativos e aténdeno profesionais desprazados dende outros municipios

A secretaria adxunta de Organización do PSdeG, o secretario xeral provincial e o portavoz no Concello demandan á Xunta máis persoal e que o PAC tamén estea en servizo polas tardes

Santiago, 11 de xullo de 2024. Os veciños e as veciñas de Rianxo están a padecer graves deficiencias na atención médica debido á falta de persoal no centro de saúde do municipio. A secretaria adxunta de Organización do PSdeG, Ana Pena; o secretario xeral provincial da Coruña, Bernardo Fernández, e o portavoz socialista no Concello, Óscar Rial, detallaron hoxe as deficiencias que lastran a atención primaria no municipio e esixíronlle á Xunta que poña remedio á situación.

Bernardo Fernández alertou de que a sanidade en xeral, e sobre todo a atención primaria, está “depauperada”, por exemplo, cunhas listas de espera “que se multiplican por tres respecto a décadas anteriores”. “Se preguntamos, non imos atopar ningún cidadán que diga que a sanidade galega está mellor que hai vinte anos”, afirmou o secretario provincial, que esixiu á Xunta que reverta as “políticas nefastas” que conduciron á actual situación de crise asistencial. “A Xunta ten as competencias e ten que adoitar medidas. Estar de brazos cruzados botando a culpa a outros non é solución”, asegurou.

Ana Pena criticou que unha vila de 12.000 habitantes non pode ter cubertas só a metade das prazas do seu centro de saúde e lamentou que “situacións coma a de Rianxo esténdense por todo o territorio galego”. “Ter acceso a unha consulta, a unha revisión médica ou a atención pediátrica é unha prioridade e débense poñer en marcha medidas que solucionen este problema”, advertiu.

Pola súa parte, Óscar Rial insistiu en demandar un servizo de calidade que satisfaga a demanda que existe en Rianxo e reprochoulle ao Goberno galego que poña “parches de forma continua” sen buscar solucións definitivas, en referencia á recente incorporación temporal dun facultativo e un MIR na súa última etapa de formación. Para o portavoz socialista no Concello é imprescindible cubrir o servizo de tarde no ambulatorio e reducir as listas de espera cando menos ata o obxectivo de 48 horas que vén propoñendo o secretario xeral do PSdeG, José Ramón Gómez Besteiro.

Só catro médicos para oito prazas

Dos oito médicos cos que deberían contar as instalación sanitarias, durante meses unicamente viñan traballando catro, xa que a dúas baixas sen substituír se unen dúas prazas que carecen de titular. A situación tamén é crítica no punto de atención continuada, xa que carece de facultativos. Deben desprazarse dende outros municipios para garantir a asistencia dos pacientes no PAC.

Non é a única carencia no tocante a recursos humanos, xa que só hai un pediatra para atender a toda a poboación infantil do concello. Hai máis dun ano que o Grupo Parlamentario Socialista presentara unha batería de iniciativas para instar á Xunta a garantir o servizo de pediatría mediante a contratación de persoal, dado que a única doutora asumía unha carga asistencial excesiva, con xornadas de ata 40 consultas. A día de hoxe a situación non mellorou.

Polas tardes non hai consultas ordinarias. Unicamente se atenden urxencias, e o PAC inicia o seu servizo ás 22.00 horas, pese a que o Partido Socialista vén demandando dende hai dous anos que a apertura se adiante ás 15.00. Trátase dunha reivindicación que asinaron 4.000 veciños e veciñas e na que insistiron hoxe os socialistas. Esa circunstancia é especialmente preocupante se se ten en conta que o centro de saúde de Rianxo se atopa a 40 minutos do hospital máis próximo.

A falta de axilidade nas citas é outra das consecuencias da presión asistencial produto do déficit de recursos humanos. O retraso na atención está a superar, nalgúns casos, os quince días. Tamén se fai notar nas urxencias, que se están a incrementar significativamente, xa que en determinadas situacións a veciñanza non pode agardar esas dúas semanas.