Os socialistas esíxenlle á Xunta que garanta a continuidade das axudas aos produtores de Tenreira Galega e critican a tardanza no seu pago
O PSdeG denuncia a situación crítica no Salnés polo desvío da ambulancia medicalizada
09/08/2024
Os socialistas galegos defenden en Bruxelas e Santiago o recoñecemento das confrarías de pescadores na reforma da Política Pesqueira Común
10/08/2024
Lara Méndez reuniuse en Cervantes con produtores para analizar unha iniciativa a través da que o Grupo Parlamentario do PSdeG lle solicita ao Goberno galego que estude a posibilidade de incluír esas achegas na PAC
A deputada socialista denunciou que a Consellería do Medio Rural se comprometera a ter aboadas as subvencións no primeiro trimestre do ano, pero non comezou a facelas efectivas ata o pasado mes de xuño
A Portavoz de Agricultura e Gandería do Grupo Socialista no Parlamento galego, Lara Méndez, esíxelle á Xunta de Galicia que garanta a continuidade das axudas á indicación xeográfica protexida Tenreira Galega de cara ao ano 2025 “e incluso máis alá no tempo” e que cumpra os prazos comprometidos para o seu pago.
A deputada lucense rexistrou na Cámara unha proposición non de lei para o seu debate a través da que tamén insta ao Goberno galego a estudar a inclusión desas subvencións aos produtores de carne da IXP no paraugas da PAC, co fin de dotalas de maior estabilidade. Méndez analizou en días pasados con socios da cooperativa A Carqueixa, no municipio lucense de Cervantes, esa posibilidade, así como o nivel de apoio da Administración autonómica ao sector.
A parlamentaria socialista criticou que a consellería comprometérase a publicar en 2023 as axudas ás explotacións gandeiras pertencentes á indicación xeográfica protexida Tenreira Galega, co obxectivo de que se aboaran dentro do primeiro trimestre deste ano, pero finalmente a publicación no DOG retrasouse a xaneiro, e en canto aos pagos, non comezaron a realizarse ata xuño.
Lara Méndez chamou a atención sobre o feito de que este tipo de axudas non só serven para paliar o incremento dos custos de produción, senón que tamén para impulsar a IXP, xa que repercuten no incremento do número de animais que se poden marcar, tal como trasladan dende o sector. Por ese motivo é crucial que a Xunta garanta a continuidade das subvencións máis alá do 2025, insistiu.
Ese compromiso serviría para dotar de máis estabilidade ao sector, dado que impulsaría a rendibilidade das explotacións de vacún de carne extensivo, contribuíndo, ao mesmo tempo, a coidar o medio rural e fixar poboación nel.
