Julio Abalde reclamou que a diplomatura e o grao de Educación Social sexan as únicas titulacións de acceso á especialidade na administración especial

Afirmou que o Goberno galego está prexudicando “a calidade dos servizos socioeducativos e o dereito da cidadanía a recibir unha atención especializada”

“O lóxico é que se se forman especialistas, esas prazas sexan precisamente para eses especialistas”, asegurou o deputado do PSdeG

O Grupo Socialista no Parlamento galego vén de demandarlle á Xunta que inclúa a diplomatura e o grao de Educación Social como únicas titulacións de acceso á especialidade de educación social da escala técnica de facultativos da administración especial. A través dunha pregunta no pleno da Cámara, dirixida ao Goberno autonómico, o deputado do PSdeG Julio Abalde esixiu a eliminación “do agravio e a discriminación” que padecen eses profesionais, xa que na actualidade se admiten para desenvolver as súas funcións estudos como mestre de Educación Primaria, licenciatura en Pedagoxía, Psicoloxía ou Psicopedagoxía, ou grado nunha titulación das ramas de ciencias sociais e xurídicas ou da saúde equivalente ás anteriores.

“O lóxico é que se se forman especialistas, esas prazas sexan precisamente para eses especialistas”, insistiu o parlamentario socialista, que sinalou que “non ten sentido que despois de implantados os estudos universitarios non se adapten as categorías profesionais”. Trátase dunha reclamación que o Colexio de Educadores e Educadoras Sociais de Galicia leva reiterando desde hai dúas décadas, e é algo que “xa sucede no ámbito privado a través do convenio colectivo de protección e reforma de menores”, subliñou.

Ademais, segundo explicou, once comunidades autónomas xa abordaron a regularización desa situación. Por ese motivo, é “insólito”, dixo, que a Xunta non ofrecera xa unha solución. Abalde indicou que a Lei de Medidas Fiscais e Administrativas do 2025 recolle unha modificación da norma do 2015 do emprego público de Galicia, pero “limítase a introducir o grao ou diplomatura de Educación Social con todas as outras titulacións que figuran actualmente”. De feito, o Grupo Socialista ten presentada unha emenda á coñecida como lei de acompañamento dos Orzamentos co obxectivo de rematar cunha situación “anómala e anacrónica”.

Recordou, por outra banda, que en febreiro deste mesmo ano, o Goberno galego, a través do seu entón director xeral de Función Pública, expresou “por escrito” o compromiso de incluír como titulación de acceso unicamente a diplomatura ou o grao de Educación Social. Ese compromiso, destacou, “ten ademais o apoio dos tres sindicatos máis representativos”.

“A Xunta continúa ancorada nunha situación que supón un desprezo e menoscabo cara a profesión, e por outra banda, trátase dun factor que incide negativamente na calidade dos servizos socioeducativos e no dereito da cidadanía a recibir unha atención especializada”, asegurou Julio Abalde.