Julio Abalde censura a diferencia de criterio para bonificar as matrículas universitarias e obrigar ás familias a pagar os libros na educación obrigatoria

O deputado denuncia que, en lugar de investir en infraestruturas e profesorado, a Xunta agarda a que o descenso demográfico arranxe as ratios de alumnos

O portavoz de Educación lémbralle ao conselleiro que boa parte dos plans que anuncia como importantes avances están financiados polo Goberno e a UE

O portavoz de Educación do Grupo Parlamentario Socialista, Julio Abalde, criticou hoxe a visión optimista “pero fóra da realidade” que ofreceu o conselleiro na súa comparecencia no pleno. Na súa intervención, o deputado do PSdeG lembroulle as protestas que se repiten “en cada inicio de curso” por parte da comunidade educativa, e que “necesitan resposta” da Consellería, “pero non a atopan”.

Abalde criticou que para o conselleiro “todo o bo corresponde á Xunta e todo o malo ao Goberno central”, pero omite que boa parte dos plans que o seu departamento exhibe como avances “están financiados polo Goberno” e a Unión Europea. Ademais, pese á posta a disposición de fondos por parte do Estado, a Administración galega incumpre os acordos coas centrais sindicais, especialmente no tocante ás ratios de alumnos por aula, fiando a rebaixa “ao descenso demográfico, que vai facendo que se axusten sen investimento”, e sen incrementar o número de docentes.

Tamén existen problemas importantes na renovación das infraestruturas educativas, con numerosos centros que necesitan “reformas imperiosas” e non se levan a cabo mentres a Consellería non pon enriba da mesa os criterios que segue o programa de renovación de infraesturas pedagóxicas, xa que, denunciou o parlamentario socialista, non se teñen en conta aspectos tan relevantes coma a antigüidade.

En canto ás axudas ás familias, insistiu en que mentres o conselleiro fala de “apoio en todas as etapas”, négase a facilitar a gratuidade dos libros de texto, coa que cada unidade familiar aforraría arredor de 6.000 euros durante a primaria e a secundaria. “Non se pode utilizar un criterio para os libros de texto e outro distinto para as matrículas universitarias”, afirmou, ao tempo que apuntou que a gratuidade destas últimas non é o garante da igualdade entre todo o estudantado, senón que o son as bolsas do Estado.

Julio Abalde referiuse tamén á situación do alumnado con necesidades especiais, cunha redución do número de profesores especialistas e coidadores que está a afectar tanto aos nenos e nenas coma ás súas familias. Puxo como exemplo do que está a acontecer en numerosos centros o que ocorre no colexio Cernadas de Castro, de Lousame, onde a Xunta vén de retirar un especialista de audición e linguaxe e un coidador pese a que no centro estudan tres nenos con autismo ou un alto grao de dependencia, que quedan atendidos por un só coidador. Tamén se vai resentir a atención aos 30 nenos e nenas con dislexia, retrasos temporais da linguaxe e outras circunstancias que precisan de atención.

“A inclusión educativa e a diversidade da educación non poden obedecer só a unha aplicación fría e ríxida das ratios”, advertiu Abalde.

Un plan que non vai máis alá dun anuncio

A Xunta anunciou recentemente o novo plan MEGA, que para os socialistas non vai máis alá dun anuncio “que vende fume baixo un nome orixinal” porque se trata dun “refrito” de programas xa existentes, “aos que se lles dá unha volta para que parezan novidosos”. Con todo, as verdadeiras novidades “non son iniciativas orixinais da Consellería”, asegurou hoxe Julio Abalde.

Nese senso, sinalou que o programa PROA, sufragado polo Estado e a UE, xa vén incorporando profesorado de apoio nas aulas dende ha varios cursos, pero criticou que, pese a que a Xunta di que ten analizadas as necesidades dos centros, estes tiveron que facer plans de reforzo e non puideron incorporar persoal deste programa ata o 2 de setembro.

Respecto do PROA, apuntou unha coincidencia: recentemente, o Goberno de España confirmou que estenderá o seu financiamento ata o 2028, e de aí o anuncio estrela dos 400 profesores por catro cursos que fixo a Xunta. Mais preguntouse que fará a Consellería cando finalicen os catro anos de vixencia do plan.

Outra das propostas do MEGA é o reforzo en competencias mátemáticas e lingüísticas a través do desdobramento de aulas e posibles clases de reforzo, propostas realizadas o pasado xaneiro na Coruña por Pedro Sánchez.

Julio Abalde criticou que a Xunta asegure adiantarse ao novo reto do alumnado estranxeiro, cando a realidade é que xa existen numerosos centros cun importante número de rapaces e rapazas foráneos, nos que o único reforzo para prestarlles a atención que precisan é o esforzo e o traballo extra do profesorado.

Exceso de burocracia

Por outra banda, lamentou que o que si implica o plan MEGA é o gran número de actividades burocráticas que deben realizar os centros de primaria e secundaria, que non dispoñen de persoal suficiente para asumir máis carga de traballo.

Mentres, as asociacións de pais e nais denuncian que a Consellería está aplicando tarde o acordo acadado cos representantes do profesorado, sen comunicar aos centros con tempo suficiente a concesión de desdobramentos, sen ter en conta na súa totalidade a presenza de alumnado con necesidades especiais e incluso reducindo profesorado de apoio mentres aumenta o número de alumnos con necesidades especiais.

Neste punto, Abalde puxo como exemplo o IES A Cachada, de Boiro, que pasou de tres profesores especialistas a un só, cando a previsión é que inicien o curso 102 rapazas e rapace con algún tipo de dificultade.