O portavoz de Educación do Grupo Socialista, Julio Abalde, asegurou que os Presupostos “non dan resposta ás necesidades que existen nos ámbitos educativo, científico, universitario e de formación profesional”

“O dereito á educación gratuíta e universal non será unha realidade mentres non se acceda á gratuidade dos libros de texto nos niveis obrigatorios”, denunciou o deputado do PSdeG

As contas de Rueda para o vindeiro ano “fomentan as prazas concertadas e privadas e a extensión dos concertos mentres se pechan unidades públicas”, criticou

O Grupo Socialista alertou durante a comparecencia do conselleiro na Comisión de Orzamentos do Parlamento que os Presupostos da Xunta para o 2025 en materia de educación medran practicamente a metade do que se incrementan as contas públicas galegas no seu conxunto. Ese “desleixo” é “especialmente preocupante” no que se refire ás contías que se contemplan para programas e partidas “que permitan garantir o dereito a unha educación de calidade, equitativa e integradora”, advertiu o portavoz socialista de Educación, Julio Abalde.

O deputado do PSdeG criticou uns Orzamentos que, en xeral, “non dan resposta ás necesidades que existen nos ámbitos educativo, científico, universitario e de formación profesional”, para, a continuación, afondar nunha análise pormenorizada das eivas que presentan.

Abalde criticou que, pese a que o conselleiro anunciou o presente curso como “histórico” e “un antes e un despois” en canto a avances no sistema educativo, “a realidade foi outra: o inicio do curso foi economicamente asfixiante para numerosas familias galegas”, debido á negativa da Xunta a recuperar a gratuidade dos libros de texto e os materiais para o alumnado de niveis obrigatorios. “O dereito á educación gratuíta e universal non será realidade mentres non se acceda á gratuidade dos libros de texto”, remarcou.

En cambio, lamentou o parlamentario socialista, “seguen medrando as partidas para a escola privada e concertada e non se suprimen os fondos para os centros que segregan por sexos, como manda a Lomloe”. Así, os Presupostos “fomentan as prazas concertadas e privadas, a extensión dos concertos educativos en ESO e, sobre todo, en FP, mentres se pechan unidades públicas ou se imparte ensino non presencial en moitos ciclos de formación profesional”, denunciou.

Dentro desa política, apuntou especialmente á situación de zonas nas que se está a producir “un drama” en relación co descenso de poboación, ao que se contribúe dende a Administración galega clausurando colexios e unidades.

Sen solucións para as deficiencias dos servizos académicos complementarios

Julio Abalde cargou tamén contra a falta de esforzo orzamentario en aspectos coma o transporte, os comedores e as actividades extraescolares. Cun panorama no que se reproducen as queixas polo incumprimento de horarios dos autobuses e o seu funcionamento irregular, bótanse en falta nos Orzamentos liñas destinadas a reverter esa situación, “especialmente lamentable” no que toca a estudantes de FP que se desprazan a concellos distintos aos de residencia.

En relación cos comedores escolares e as actividades complementarias, Abalde sinala que de novo a Xunta se nega a asumir como propio un servizo que están a prestar as ANPA e os concellos, e nin sequera se reflicte nas contas públicas unha simple “intención” de facelo. 

A falta de fondos trasládase tamén ao ámbito universitario. “Cómpre un maior financiamento do sistema polo incremento de custes”, explicou o deputado do PSdeG, que detallou que a mala situación económica das universidades “agrávase pola decisión da Xunta de conxelar as taxas de grao e mestrado”, unha medida que os socialistas comparten, recordou, pero que debe levar aparellada unha compensación suficiente dende os Orzamentos.

Por outra parte, a conxelación das taxas “acabouse financiando con recursos propios das universidades”, cun desfase que a propia consellería cuantifica en máis de 200 millóns de euros dende o 2011 respecto da media española.

Finalmente, demandou que a Xunta “faga unha aposta decidida por un sistema de residencias universitarias, con prezos razoables e bolsas suficientes”, para garantir o acceso de toda a mocidade galega aos estudos superiores, cada vez máis complicado debido ao problema da vivenda. Pero non figura así nas contas, lamentou.

En resumo, “un ano máis estamos ante uns Orzamentos que reflicten a ausencia de proxecto e ambición” para atender os problemas da educación e enfrontar o futuro. “E aínda hai moito menos interese por parte do Goberno da Xunta por que a ciencia, o coñecemento e a formación progresen, se afiancen e se adapten aos novos tempos”, concluíu Julio Abalde.