O PSdeG insta á Xunta a “deixar de escapar” das súas competencias e lamenta que “todo se limite a pedir ao Estado que resolva”
Gonzalo Caballero insta a Feijóo a “rectificar” porque “a falla de previsión e organización” da Xunta no inicio do curso “non ten parangón”
23/09/2020
O novo conselleiro de Sanidade contradí a cifra de 6.108 rastrexadores da covid anunciados por Feijóo
23/09/2020
O vicevoceiro do PSdeG, Pablo Arangüena, instou este mércores á Xunta de Galicia a “deixar de escapar das súas competencias” e lembrou que neste contexto de pandemia, o núcleo das competencias cruciais como sanidade, educación e os servizos sociais “son competencias autonómicas plenas” aínda que lamentou, “nesta crise descubrimos que a culpa dos problemas é do Estado e todo se limita a pedirlle que resolva dende Madrid”.
Tras a comparecencia do vicepresidente Alfonso Rueda no pleno Parlamento, Arangüena esixiulle “un cambio de actitude” nesta lexislatura, “vostedes non xestionan, deixan pasar o tempo e o tempo que deixan pasar é tempo perdido para Galicia”. O deputado socialista salientou “o desleixo” arredor da situación das residencias e lembrou que a administración autonómica “ten a obriga” de organizar, inspeccionar e sancionar, aínda que segundo sinalou, “ata o de agora lles interese máis que determinados imperios xeriátricos sigan obtendo enormes beneficios”.
En canto a áreas concretas, Arangüena referiuse ao anuncio en abril dun plan de reactivación do Turismo e a Cultura de 27 millóns de euros, e no discurso de investidura de Feijóo dun plan de choque de 58 millóns, unhas cifras “irrisorias cando a Xunta manexa uns orzamentos de 11.000 millóns de euros e tendo en conta o impacto da pandemia nestes sectores”.
Neste sentido, o parlamentario recordou que o PP rexeitou hai uns días a proposta do PSdeG en comisión para impulsar un gran acordo para reactivar o turismo que implicase a todas as administracións, axentes económicos e sociais.
Por outra banda, no que atinxe a Xustiza o deputado socialista lembrou aos populares que “tras 11 anos no poder a situación da Xustiza en Galicia foi a peor”, e citou como exemplos “o alongamento do prazo de tramitación dos procedementos” ou a conflitividade cos profesionais cunha folga dos funcionarios hai dous anos “de 114 días, triste récord de folga de funcionarios en España”.
Neste eido, o vicevoceiro socialista concluíu emprazando á Xunta a “cumprir” as ordes sobre medidas de seguridade e protección fronte a covid, tanto nas “condicións de traballo de funcionarios e profesionais” nas dependencias xudiciais como “no acceso e tránsito dos usuarios”.
