Lara Méndez advertiu que no último ano os porcos bravos causaron preto de 4.000 accidentes e danos ao sector primario por valor de 12 millóns de euros, uns datos que cualificou de “inasumibles”

O Grupo Socialista no Parlamento de Galicia vén de esixirlle á Xunta que avalíe a efectividade das medidas que está aplicando para controlar a poboación de xabarís na comunidade autónoma. Lara Méndez lembrou esta tarde no pleno da Cámara que no último ano se rexistraron 3.767 accidentes provocados por porcos bravos, que, ademais, causaron danos ao sector agrario por valor duns 12 millóns de euros.

Pese a que nos últimos anos se capturaron unha media de practicamente 20.000 xabaríns, “as políticas do Goberno galego non funcionan”. Os prexuízos que ocasiona a especie obrigaron á Administración galega a pagar indemnizacións que sumaron 3 millóns de euros só o ano pasado. “Son datos inasumibles”, sentenciou a deputada socialista.

Durante a exposición dunha pregunta oral á conselleira, Méndez explicou que os efectos do crecemento imparable do número de individuos non quedan só aí, xa que aos sinistros e os danos en colleitas e pastos se unen os destrozos en espazos protexidos, ao que se une, por enriba, que a especie constitúe un reservorio de enfermidades con potencial risco para a saúde das persoas e dos animais domésticos.

Entre os posibles motivos que poden explicar a expansión do xabaril, a deputada citou o abandono do rural ou a política forestal da Xunta do PP, que está a mermar a biodiversidade.

Por todo elo, Lara Méndez reclamou que a Xunta explique se está a elaborar algún tipo de informe ou estudo acerca do alcance das medidas que está aplicando para reducir a poboación de xabarís, sen que a conselleira lle confirmase ese extremo. Nese senso, avisou de que esa avaliación é imprescindible.