Margarita Martín alerta de que Galicia está á cola de España no desenvolvemento dos Servizos Sociais “moi lonxe” de cubrir as necesidades que merecen os galegos e das galegas

A secretaria de Política Social da Executiva do PSdeG, Margarita Martín, esixiulle hoxe ao presidente da Xunta unha “reacción política urxente” diante do último informe da Asociación de Directoras e Xerentes de Servizos Sociais, que supón unha “emenda á totalidade” da xestión da Xunta en Política Social. Este informe sitúa a Galicia á cola no desenvolvemento de Servizos Sociais, só por riba de Murcia e Cantabria e empatada con Madrid.

Sinalou que a cidadanía de Galicia “non merecemos ser tratados como cidadáns de segunda”, tal e como pon de manifesto unha vez máis este informe, que evidencia que a cobertura de Servizos Sociais nesta Comunidade Autónoma está “moi lonxe de cubrir as necesidades dos galegos e das galegas”. Alertou que esta é a consecuencia de 15 anos de desmantelamento do Estado do Benestar polos gobernos do PP e a súa “desatención sistemática ás persoas máis vulnerables.

Martín esixiulle ao presidente da Xunta que tome medidas diante da “incompetencia manifesta” pola responsable de Política Social e “sitúen dunha vez ás políticas sociais e ás persoas no centro da acción de goberno, cuns orzamentos e unha xestión axeitados á realidade do país”. Esixiulles que “deixen de confrontar co Estado” e “constrúan” un Plan de choque para construír un “novo sistema de coidados” que pasa por “deixar de privatizar a atención ás persoas que máis o necesitan”.

Explicou que o informe vén ratificar as denuncias reiteradas polos socialistas galegos, que “levamos anos alertando da gran precariedade e deterioro dos Servizos Sociais” provocado pola xestión “nefasta” do goberno galego. Lamentou que logo de década e media de desmantelamento, Galicia sitúase como unha das comunidades autónomas co peor desenvolvemento de Servizos Sociais, sinaladamente en cobertura na prestación de servizos.

Galicia está por debaixo da media estatal no orzamento para atender ás necesidades das persoas que máis o necesitan, está por debaixo no número de profesionais que traballan en Servizos Sociis e tamén na cobertura ás persoas no limiar da pobreza e as que perciben a renda de inserción autonómica.

O mesmo sucede co número de persoas que perciben o Servizo de Atención no Fogar, e tamén está por debaixo na cobertura de prazas en centros residenciais para maiores, discapacidade, aloxamento para persoas sen fogar, prazas de acollida a mulleres vítima de violencia de xénero, e tamén no servizo de telasistencia, nun 4,5 por cento fronte ao 14,5 por cento de media do Estado.