O PSdeG advirte que o goberno galego pon en risco a chegada de fondos adicionais pola súa reticencia a aplicar a Lei estatal que permite topar os prezos dos alugueiros
Julio Torrado sinala que a Xunta fai todo o posible por entorpecer o desenvolvemento da Lei de Vivenda impoñendo aos concellos atrancos administrativos para solicitar a declaración de zonas tensionadas
Esíxelle ao goberno galego que “estea á altura” da súa responsabilidade e xestione os fondos do Bono Alugueiro Mozo “con responsabilidade, transparencia e dilixencia” para “evitar caer na mesma chapuza do ano pasado”
O portavoz da Executiva do PSdeG, Julio Torrado, criticou que o goberno galego manteña a súa posición de entorpecer o desenvolvemento da Lei de Vivenda que permitiría declarar zonas tensionadas para controlar os prezos da vivenda, co risco de perder fondos adicionais do Estado. Advirte que o goberno galego está a converter aos galegos e galegas en ”vítimas do seu seguidismo das directrices marcadas dende o PP de Madrid”.
O responsable socialista criticou a reticencia á hora de exercer as súas competencias en materia de vivenda para aplicar a Lei estatal que permite determinar zonas tensionadas e controlar os prezos do alugueiro. Lembra que en localidades como A Coruña os prezos do alugueiro medraron un 48 por cento nos últimos 8 anos, e o goberno galego négase a fixar un tope mesmo a costa de perder as axudas comprometidas polo Estado.
Afeoulle ao Executivo autonómico que, en lugar de aproveitar a oportunidade aberta pola Lei de Vivenda para limitar os prezos dos alugueiros e axudar ás persoas á hora de afrontar o pago do alugueiro, decidan boicotear o eu cumprimento impoñendo requisitos administrativos aos concellos para solicitar a declaración de zonas tensionadas.
Bono Alugueiro
O responsable socialista esixiulle ao goberno galego que “estea á altura” da súa responsabilidade e xestione con “responsabilidade, transparencia e dilixencia” os 11,4 millóns de euros adicionais que recibirá para financiar o Bono Alugueiro Mozo e “evitar caer na chapuza de outros anos”.
Aludiu así á anterior edición destas axudas de 250 euros concedidas polo Estado que primeiro a Xunta quixo facer pasar por propias e, despois, foi o Valedor do Pobo quen deu a alarma do incumprimento do prazo de tres meses para comunicar as resolucións, chegando a comunicar o rexeitamento das axudas ata preto de dous anos despois.
