Julio Torrado incide na necesidade de que se reverta o servizo para o sistema público “para aumentar a calidade e acabar coa indefensión laboral dos traballadores”

O voceiro de sanidade no Parlamento de Galicia, Julio Torrado, denunciou que o Sergas “só actúa cando ten os problemas na porta” e amosou o apoio aos traballadores de ambulancias da área de Pontevedra-Salnés, insistindo na necesidade que se reverta ao sistema público este servizo ante a “para aumentar a calidade e acabar coa indefensión laboral dos traballadores”.

O representante socialista pronunciouse a raíz da concentración diante do hospital de Montecelo dos traballadores de Ambulancias Civera, deste pasado mércores 4, xa que protestaban polos impagos dos seus salarios ao responsable último, o xerente Sergas na área sanitaria de Pontevedra- Salnés.

Torrado afirmou que non é algo novo esta problemática, xa que este tipo de problemas coas concesionarias veñen sucedéndose dende hai moito tempo e dende o PSdeG xa alertaban disto. Moitas destas concesionarias “vulneran constantemente os dereitos dos seus traballadores e o Sergas só se preocupa cando ve o problema nas súas portas”, denunciou.

O deputado do PSdeG recalcou que esta postura é repetida pola dirección do sistema sanitario galego constantemente, actuando unicamente “cando os titulares de prensa non deixan maior opción, estando de costas á realidade derivada da súa xestión”. Os traballadores cualifican directamente ao Sergas como “cómplice” da vulneración dos seus dereitos laborais por parte da concesionaria.

Julio Torrado entende que estamos ante un problema de maior profundidade, xa que considera que o sistema en si está mal formulado dende un inicio, comezando polos prego administrativos nos que a Xunta esixe “un número mínimo de ambulancias sempre inferior ao necesario”, polo que considera que “está poñendo unhas esixencias de calidade moi baixa”, sendo normal que as empresas privadas traten de cumprir soamente co mínimo para aforrar custos.

A propia dinámica do sistema que custa “máis 200 millóns de euros” baseado no servizo a través de empresas privadas é “ineficaz” para o socialista, xa que “a pesar da calidade dos traballadores” hai moitos déficits de prestacións debido a que as empresas non invisten os medios necesarios e incumpren constantemente cos seus traballadores.

Sendo un servizo de “importancia vital” para o funcionamento do sistema sanitario, do que o Sergas é o único responsable, Torrado insistiu en que volverán a esixir no Parlamento“as veces que faga falta” a reversión ao sistema público do mesmo para ter uns estándares de calidade e de condicións laborais dignos, como xa fixeron no seu momento e que o PP rexeitou coa súa maioría absoluta na cámara.