Carlos López Font esixe garantías para frear a especulación coa vivenda protexida e denuncia o desleixo do goberno galego nos 15 anos de gobernos do PP

O portavoz de Vivenda do Grupo Socialista, Carlos López Font, lamentou hoxe o voto en contra do PP á proposta que presentou no Pleno do Parlamento para reclamarlle á Xunta que garanta a seguridade xurídica da cualificación permanente da vivenda protexida incorporando ademais compromiso orzamentario con “obxectivos e prazos concretos” na construción de inmobles protexidos.

O responsable socialista esixiulle á Xunta garantías legais para frear a especulación coa vivenda protexida. Esta blindaxe afectaría a aquelas que se constrúan sobre chan de reserva privado e público para vivenda protexida, cumprindo coa lexislación estatal, e debera impedir que se poidan allear os bens patrimoniais integrantes dos parques públicos de vivenda.

López Font sinala que a Lei estatal que garante o dereito á vivenda  obriga a que as vivendas protexidas deberán estar sometidas a un réxime de protección pública que impide que pasen ao mercado de vivenda.

O parlamentario socialista lembra que a Xunta ten a competencia exclusiva en materia de vivenda, polo que lle reclama que garanta partidas orzamentarias para vivenda protexida como mínimo ao mesmo nivel que o Estado. Urxe a incrementar de forma “urxente e progresiva” o parque de vivenda social para superar os 15 anos nos que os gobernos do PP reduciron a construción de vivenda ao mínimo.

Criticou que a Xunta teña mudado a política de construción de vivenda pública pola “política de confrontación” co goberno central mentres reducían a construción a mínimos históricos, contribuíndo á situación de emerxencia actual.

Advertiu que os mozos e mozas non poden nin pensar en comprar piso e teñen que destinar máis da metade do seu salario ao alugueiro polo desleixo do goberno galego, que disparou o número de demandantes de vivenda pública por enriba dos 18.000 en toda Galicia.