Carmen Dacosta lamenta que o PP rexeite unha fronte común de partidos e cidadanía para recuperar un espazo “vital” para a cidade

A parlamentaria socialista Carmen Rodríguez Dacosta alertou hoxe de que o voto do PP, que hoxe rexeitou a proposta socialista para rehabilitar a Praza de Abastos nº 1 de Ourense, está a poñer en dúbida o acordo asinado onte mesmo polo conselleiro de Emprego e os praceiros para levar adiante o Plan funcional. A responsable socialista alerta de que este voto “contradí” e desminte ao conselleiro.

A responsable socialista lamentou que o PP se apeara hoxe da proposta socialista para conformar unha “fronte común” entre tódolos partidos políticos e a cidadanía. Advertiu que co seu voto poñen en cuestión unha actuación fundamental para evitar unha situación irreversible e para rematar co abandono do edificio histórico e a paralización dunha zona de desenvolvemento urbano, turístico, termal e comercial fundamental para a cidade.

Advertiu que con este voto en contra poñen en cuestión o compromiso real do goberno galego, xa que se están a negar a facer públicos os termos do convenio, e sinalou que “aínda está por ver o compromiso orzamentario real da Xunta”. O Grupo Socialista pedíalle á Xunta que presentara no Parlamento o Plan funcional para a distribución comercial da Praza, a segunda fase do proxecto de remodelación integral do Rianxo e a construción dunha piscina termal nos baixos daquel inmoble.

En concreto, reclamáballe ao goberno galego que adoptara “tódalas medidas oportunas, tanto orzamentarias como de desbloqueo urxente” do proxecto estratéxico para a Rehabilitación Integral da Praza. Lamentou que teñan perdido unha oportunidade histórica para impulsar o desbloqueo urxente do proxecto estratéxico de Rehabilitación Integral da praza e a súa contorna.

Dacosta reclamou o compromiso da Xunta para recuperar este espazo, bloqueado pola “parálise, falta de dilixencia e inquina persoal dalgún dos máximos mandatarios que exerceron a responsabilidade institucional ata agora, concretamente o actual alcalde da cidade”.