Carmela Silva criticou a “alianza entre populares e nacionalistas”, que defenden con argumentos “peregrinos” un un trazado repleto de curvas “que van provocar accidentes”

A senadora do PSdeG cualificou de “irresponsable” a proposta de conexión pola AP-9, que, ademais, “non é axeitada para soportar 63.000 vehículos ao día”

Lembrou que no acceso actual, pola A-55, producíronse case 4.000 sinistros en menos de 20 anos, con resultado de 15 vítimas mortais

A senadora socialista Carmela Silva cualificou hoxe de “irresponsable” a petición do PP e o BNG de que se paralice o proxecto da autovía entre Vigo e O Porriño que dotará dun novo acceso viario á cidade olívica. A tamén presidenta do PSdeG criticou a “alianza entre populares e nacionalistas”, que “pretenden enganar á cidadanía” con argumentos “peregrinos”.

“Din que unha alternativa pola AP-9 é posible, cando saben perfectamente que non, porque é perigosa, ten curvas que van provocar accidentes e porque as súas interconexións non teñen capacidade nin un trazado axeitado para soportar 63.000 vehículos ao día”, detallou.

Durante o debate dunha moción promovida polo PP na Cámara Alta, Silva criticou que “o único que defenden de verdade” PP e BNG é que Vigo perda investimentos. “Ese é o seu único obxectivo”, engadiu. A senadora socialista recordou que o Partido Popular, cando tivo responsabilidades de goberno, “non fixo nada para resolver a accidentalidade que ten a A-55 actual, con 3.878 feridos en 19 anos e 15 vítimas mortais”. A día de hoxe, precisou, hai dúas persoas hospitalizadas tras unha colisión nesa vía.

Así, en vez de estar preocupados polo número de sinistros, os feridos e os falecidos, “o único que lles preocupa é que sexa o alcalde de Vigo quen conseguiu que por fin haxa un proxecto con Pedro Sánchez”.

PP e BNG “equivócanse gravemente. A A-52 farase e en fronte terán a todo Vigo, como xa o tiveron en outras ocasións, cando se opuxeron a demandas históricas da cidade”, concluíu.